Маж на возраст од околу 50 години утрово е пронајден мртов на плочникот кај месарниците пред Зелено пазарче во Скопје. Случајот во полиција е пријавен утринава и најверојатно станува збор за бездомник кој секојдневно се движел во околина на пазарот. На местото на настанот увид изврши полицијата, а од страна на лекар е констатирана смрт, јавува МИА.
Пред неколку дена ЦИВИЛ Медиа објави прилог на граѓански новинар дека на крстосницата кај „Мавровка“, се качија во автобусот на ЈСП неколку полицајци и специјалци за да легитимираат едно бездомно лице, и откако се уверија дека не е криминалец, решија само да го симнат од автобусот и да го пуштат да си оди. Дома, на улица?
Јавна тајна е дека бездомните и сиромашни лица ги користат (или поточно ги користеле) јавните превози, обложувалници, трговски центри, автобуски станици за да се стоплат. Таа „привилегија“ за жал повеќе ја немаат, бидејќи обезбедувањето на објектите не ги пуштаат да влезат, оти така им наредиле газдите.
Човечноста во луѓето одамна изумре… Во општество како нашето стана дури и нормално да има вакви немили и нехумани настани.
Едно ќебе, перница, стар јорган и неколку картони распослани пред деловен објект кој се издава, е живеалиштето на 57-годишниот битолчанец Б.К. , кој скоро две години своето секојдневие го поминува во населбата Карпош, а преживува само од милостината на случајните минувачи и неколкуте пријатели кои му даваат храна.
„Од Центарот за социјални работи ме одредија сега во бараките на Црвен крст, каде наутро доаѓаат во 8 часот и заклучуваат, па отвораат навечер во 19 часот, а во меѓувреме јас немам каде да одам. Еве почна да врне снег, ми студи и мене, може ќе паднам болен, а тие клуч од бараката не ми даваат. Овде каде што сум, ме врне и ми студи, а немам каде да одам. Пред неколку денови еден човек ме однесе во бараки кои му припаѓале на „Гранит“. Таму ми беше добро и поминав две ноќи, но дојде еден човек кој се претстави како управник, викна полиција, со мене се однесуваа како да продавам оружје и ме избркаа и од таму. Сега сум без ништо“, вели Б.К, за ЦИВИЛ Медиа.
Активистите од „Легис“ покренаа акција преку ноќни посети на бездомниците, што од различни причини не се сместени во дневниот прифатен центар, барем малку да ги стоплат на овие ниски температури со чај и супа. Тие ги повикуваат сите граѓанки и граѓани да ги известат доколку имаат информација за локации каде се забележани бездомници, да донираат чај, термоси и супи.
На крај, наместо специјалци, со бездомните и сиромашни лица нека се позанимаваат надлежните институции и конечно нека најдат решение за нивните проблеми, инаку ќе мора да им наоѓаат гробни парцели.
Дехран Муратов
