Џабир Дерала, претседател на ЦИВИЛ – Центар за слобода, на промоцијата на публикацијата: „Слободни избори: Научени лекции“, која е резултат на мониторингот на локалните избори во 2017, ги претстави препораките, наодите и анализите на организацијата од долгорочниот мониторинг на политичките и изборните процеси во земјата. Тој истакна дека препораките веќе се доставени до Министерството за правда, на средбата со министерот Салији, што претходеше на денешниот настан.
Во препораките на ЦИВИЛ, најголем простор е отстапен на предлозите и барањата кои се однесуваат на Државната изборна комисија. Освен препораките, публикацијата содржи и извештаи и анализи на изборниот процес, со акцент на изборните нерегуларности, но и ставови и мислења за можностите и предизвиците за ефикасно спроведување на реформите во изборниот систем, што всушност се дел и од препораките што денеска беа презентирани.
Дерала потенцираше дека, како на предвремените парламентарни избори во 2016, така и на локалните избори во 2017, нерегуларностите во голем дел се последица од неефикасноста и политизираноста на Државната изборна комисија, односно на изборната администрација.
„Сакам да потенцирам дека нашите препораки не очекуваме да бидат сфатени како критика или намера на организацијата да навреди или повреди некого. Напротив, се водиме од начелото дека препораките претставуваат добронамерни, конструктивни и разумни критики кои треба да бидат послушани. Цврсто веруваме дека го претставуваме гласот на голем број граѓанки и граѓани онака како што тие нам ни се адресираа и обратија во изминатите години… Институциите мора да работат за луѓето, а не обратно!“, изјави Дерала.
Став на ЦИВИЛ е дека членовите на Државната изборна комисија, не само што немаат право да бараат апанажа, туку мора да бидат земени на одговорност поради науспехот да спроведат квалитетен изборен процес, а уште повеќе поради злоупотребата на јавните пари.
Поминувајќи низ содржината на извештајот, освен на препораките до ДИК и надлежните институции за изборни процеси и на изборните нерегуларности, Дерала обрна внимание и на финансирањето на политичките партии и изборните кампањи, како и на анализите на дел од членовите на експертскиот борд на ЦИВИЛ, Хедер Роберсон и Сашо Орданоски.
„ЦИВИЛ -Центар за слобода ќе продолжи со своите актвности во доменот на изборниот процес. Тоа што сте присутни во голем број, значи дека, сепак, постои интерес изборниот процес да биде подобар, поквалитетен, послободен и позаконит. Тоа што ние го видовме во изминатите изборни процеси, со извесни подобрувања за овие локални избори, ни одалеку не е доволно за да имаме навистина слободни избори“, рече Дерала и, во име на ЦИВИЛ, побара од институциите да започнат со реформи час поскоро.
Биљана Јордановска
