Светот забрзано се менува. Финансиските, политичките, воените и културните центри стекнуваат и губат превласт преку ноќ, а последиците од деструктивните тенденции се катастрофални и далекусежни. Во тој свет на непрекината и беспоштедна битка за доминација и контрола, граѓанинот/граѓанката често е на последно место во „големата слика“ на оние што ги кројат глобалните, регионалните и националните политики.
Одговор на овие трендови се обидува да даде Граѓанската повелба која беше промовирана во октомври 2016 година на конференцијата Глобални перспективи. ЦИВИЛ е меѓу првите 50 организации-потписнички во светот. Од тогаш, ЦИВИЛ активно го поддржува и промовира овој глобален документ кој ги реафирмира човековите права и слободи, пред сѐ со гласните барања за учество на граѓанките и граѓаните во процесите на донесување одлуки на локално, национално и глобално ниво.
„Граѓанска повелба – Што има тука за мене?“ е пилот проект преку кој ЦИВИЛ -Центар за слобода ќе продолжи да ја промовира Граѓанската повелба на еден поинаков начин. Со проектот ќе се истражат можностите за воспоставување меѓусекторска соработка и партнерства за усвојување и доследно спроведување на Граѓанската повелба.
Целта на проектот е засегнатите страни во граѓанското општество, локалната и централната власт, медиумите, бизнис заедниците и политичките партии да се запознаат со содржината на Граѓанската повелба и да дискутираат за усвојување и користење на овој документ, како и можностите за заедничка соработка и партнерство.
Во Граѓанската повелба се бара вистинско и доследно почитување на слободата на изразувањето и слободното здружување, ефективното граѓанско учество и создавањето услови за вистинско влијание врз јавните политики, правото на финансиска поддршка за граѓанските иницијативи, учеството во домашниот и меѓународниот дијалог и соработка.
Од секоја влада се бара да обезбеди услови, законски, административни и други мерки за почитување, заштита, промовирање и исполнување на човековите права и слободи, да ги истражува нападите врз поединци и организации со цел осомничените сторители да одговараат во согласност со меѓународните стандарди за правичност. Од владата, бизнисот и граѓанското општество се бара да бидат одговорни и транспарентни пред јавноста и законите.
ЦИВИЛ ќе одржи работилници со претставници од секоја целна група во главниот град Скопје и во Куманово. На крајот од пилот проектот, ќе се одржи конференција, на која ќе бидат поканети претставници на Владата и Парламентот, медиумите, граѓанското општество, бизнис заедницата и претставници на странски организации и фондации. Конференцијата ќе биде отворена за широката јавност, а екипата на ЦИВИЛ Медиа ќе продуцира и повеќе медиумски содржини за популаризација на Граѓанската повелба.
Граѓанската повелба ќе биде промовирана и преку информативни штандови за директна комуникација со граѓанките и граѓаните и за прибирање потписи за меѓународната петиција за поддршка. ЦИВИЛ го преведе овој документ на повеќето јазици кои се говорат во Република Македонија и ги достави до сите меѓународни организации кои ја предводат оваа глобална иницијатива. Дел од овие повеќејазични материјали на ЦИВИЛ се веќе објавени на повеќе веб страници низ светот.
Проектот е поддржан од Меѓународниот центар за граѓанско општество.
Џабир Дерала
