10 април во светот се одбележува како Ден на еднакви плати, а според податоците на Фајненс Тинк жените во Македонија се за 12% помалку платени од мажите, а разликата се зголемува до 18% кога се земаат предвид образованието, возраста, секторот и занимањето.
„За работно време од 08:00 до 16:00 часот жените треба да заминат од работа во 15:04 за да бидат еднакви со мажите, што е соодветно на јазот во плати од 12%“, стои во податоците објавени на фејсбук страната на организацијата.
Во Македонија мажите земаат поголеми плати од жените според возраст, стаж и големина на претпријатие, со исклучок на лицата со работен стаж меѓу 30 и 34 години каде жените земаат 6% поголема плата.
Порастот на минималната плата и воедначувањето во секторите текстил и кожа – кои вработуваат повеќе жени – се очекува да придонесе за намалување на родовиот јаз во платите.
Според Фајненс Тинк покрај зголемувањето на минималната плата како можно решение за намалување на родовиот јаз во платите ги наведуваат и воведувањето на онлајн калкулатор на плати во различни индустрии, сектори и професии, зголемување на бројот на установи за детска грижа, воведување на флексибилно работно време, воведување право за скратено работно време на родител на новородено дете, воведување татковско платено отсуство, развивање на вештините кај жените и нивна поддршка во субвенционирано отворање претпријатија, зголемување на учеството на жените во стручното образование, родова еднаквост во приватниот сектор и контроли за намалување на родовиот јаз, национална кампања за ззголемување на свеста кај граѓаните со цел намалување на негативните последици од родовиот јаз во плати и спроведување на годишен извештај за родовиот јаз во плати.
М. Ивановска
