Автопатите Гостивар-Кичево и Скопје-Блаце и патот Крива Паланка до границата со Бугарија, се идните проекти кои ќе бидат во фокусот на соработката со Европската банка за обнова и развој (ЕБОР), истакна министерот за финансии Драган Тевдовски, кој учествува на Годишните средби на ЕБОР, што се одржуваат во Јордан.
ЕБОР е заинтересирана за финансирање на овие проекти и има можност за доделување грант средства за изведување на дел од градежните работи за автопатот Гостивар-Кичево, за што стана збор на средбите. Грантот би се однесувал за дел од изградбата на првата делница од автопатот, односно делницата Букојчани – Кичево во должина од 12 километри. Се очекуваат и грант средства и за реконструкција на патот Крива Паланка-Деве Баир.
– За автопатот Скопје – Блаце веќе добивме грант од ЕБОР за комплетирање на проектната задача, која треба да биде готова за помалку од три месеци, истакна Тевдовски.
Како што посочи, најголем дел од соработката на Македонија со ЕБОР е во транспортниот сектор. Во делот од железничката инфраструктура на средбите се зборуваше за реконструкција на пругата Скопје – Кичево.
– Од железничката инфраструктура, важен е Коридорот 8 – пред се како идни проекти Скопје – Кичево. Битен е и проектот за електронски системи долж Коридорот 10 и проектот за изградба гранична станица на железничкиот Коридор 10, помеѓу Република Македонија и Република Србија, рече Тевдовски.
Тој истакна и дека Годишните средби на Европската банка за обнова и развој се одлична можност да се зборува за крупни капитални проекти, бидејќи на нив присуствуваат клучни луѓе на финансискиот сектор.
– ЕБОР е сериозен партнер на Македонија. Нивното тековно портфолио на проекти изнесува 707 милиони евра. Најголем дел од проектите се од транспортниот сектор, во патната инфраструктура, каде ЕБОР учествуваше во финансиската конструкција на патот Демир Капија-Смоквица, на експресниот пат Штип-Радовиш, ремонтот на пругата на Коридорот 10 и рехабилитација на железничката пруга на Коридор 8, рече Тевдовски.
Покрај билатералните средби со високи претставници на ЕБОР, министерот Тевдовски ќе учествува и на Тркалезната маса на Бордот на гувернери и на панелот „Зелена инфраструктура“. (МИА)
