На тематскиот форум „Една година Влада – осврт на граѓанските организации“ во организација на Цивика Мобилитас, на 31 мај 2018, повеќе од 100 претставници на граѓанските организации имаа можност да упатат прашања до премиерот Зоран Заев и министерот Дамјан Манчевски поврзани со работата на Владата на Република Македонија и Министерството за информатичко општество и админстрација.
На почетокот Заменик амбасадорот на Швајцарија во Македонија, Стефан Томаџан истакна дека овој настан е одлична можност во директна комуникација на граѓанското општество со претставниците на власта да се оствари дијалог кој ќе придонесе во решавање на општествените промени.
„Сакам да нагласам дека навистина ни е драго колку актуелната влада вложува напори да го приближи граѓанското општество и нивните мислења во креирањето на политиките на Владата и на одредени министерства, а тоа е важен чекор во демократизација на државата преку граѓанското учество. Ова е едно од клучните придобивки на швајцарската демократија и систем што сакаме да го пренесеме овде, не поради идеолошки причини туку поради политичка стабилност и економски просперитет“, изјави Томаџан.
Во воведното обраќање премиерот Зоран Заев ги поздрави сите присутни претставници на граѓанскиот сектор, на Македонскиот центар за меѓународна соработка, како и претставниците на Цивика мобилитас, на Швајцарската агенција за развој и соработка и на Шведскиот институт за јавна администрација.
„Вашето теренско (грас-рут) искуство, долгогодишната работа, анализите за клучни состојби во државата и од директен интерес за граѓаните на Република Македонија, помогнаа кога го создадовме реформскиот План 3-6-9. А, еве и овде ќе се обврзам, иако соработката со голем дел од вас e интензивна, дека граѓанскиот сектор останува активен дел и од практикувањето на политиките на Владата, и од носењето промени на сите нивоа. Постигната е свест дека невладиниот сектор и граѓанските организации се една од најважните алки меѓу граѓаните и системот. Зошто? Затоа што ни се неопходни сите можни, и надворешни, и внатрешни механизми, со коишто промените се можни“, изјави Заев.
Потенцирајќи дека фокусот мора да биде насочен пред сè кон граѓанските интереси, Заев потсети на придонесот на проектот на МЦМС „Граѓаните за промени“ во одбраната на демократските и еврошските вредности.
„Потребно ми е и мене како премиер и на Владата, да продолжиме со активната, двонасочна отвореност и соработка и да дадете поддршка како граѓанско општество за економски развој и просперитет на Република Македонија. Вашата проактивност во нудење на решенија е клучна“, рече Заев.
Премиерот одговараше на прашањата за финансирањето на граѓанските организации, за борбата против корупцијата, еколошките прашања, правата на Ромите и улогата на граѓанското општество во политичките процеси што се во тек, но зборуваше и за сите оние што како граѓански претставници влегоа во составот на Владата и за нивните заслуги во општествените промени.
Биљана Јордановска
Камера: Атанас Петровски
.
