Во Кривичнот суд денеска имаше три нови рочишта за предметите „Таргет-Тврдина”, „Тарифа” и „Титаник 3″ на Специјалното јавно обвинителство.
Во „Таргет – Тврдина” обвинети се поранешниот началник на Петтата управа во МВР Горан Грујевски и вработениот во УБК Никола Бошкоски, кои се во притвор во Грција, како и поранешната министерка за внатрешни работи Гордана Јанкулоска, поранешниот директорот на УБК Сашо Мијалков, шефот на кабинетот на Мијалков, Тони Јакимовски, Владимир Варелов од УБК и уште пет други лица од Управата.
Сашо Мијалков цврсто решен да се брани од слобода понуди еден милион евра за да биде пуштен од притворот во Шутка. Како што објавија медиумите повикувајќи се на судски извори, се работи за три недвижни имоти со вкупна вредност од 1,092 милиони евра.
Протест(и)
Продолжи протестот на вработените на Клинички центар кои освен за зголемувањето на цената на паркингот, побараа и продолжување на дијалогот за покачување на платите. Вработените во Клинички, започнаа штрајк во болничкиот круг, откако Град Скопје прво најави, а потоа и донесе одлука за поскапување на месечниот билет за паркирање за вработнеите од 300 на 800 денари.
Малку поинакви протести продолжуваат и понатаму пред Собранието. Пет протестанти го загушија центар. Палеле гуми палети и ѓубре објави граѓанин на Твитер.
„Секоја чест Оливер Спасовски од МВР, очигледно не може да се справиш со проблемиве ни ти ниту Петре Шилегов, ниту Саша Богдановиќ – Србче… Казнувате луѓе што прават ајвар, а оставате да ви палат гуми во центар на Скопје, каде се комуналните инспектори на град Скопје и општина Центар“, беше коментарот на еден граѓанин.
Во затворот Идризово се прекина штрајкот со глад што започна во понеделникот како реакција на незадоволството што за 27-ми април политичарите подготвија амнестија за своите колеги. Штрајкот се прекина по состанокот со директорот на затворот кој ветил дека нивните барања ќе бидат претставени на сотанок во Владата.
Семејствата на затворениците го откажаа и за утре најавениот протест пред владата. Затворениците бараат амнестија и за нив како и за 27-ми април, да се преиначат доживотните затворски казни во определени временски казни, ревизија на сите судски процеси за кои сметаат дека се монтирани и европско регулирање на статусот на затворениците од странство.
Слобода на движење
На 13 декември ЦИВИЛ потсетува на 13 член од Универзалната декларација за човекови права, според кој секој има право на слободно движење.
Негирањето на правото на слободното движење во рамките на националните и меѓународните граници може да има длабоки последици по другите основни човекови права, кои што се наведени во Универзалната декларација за човековите права.
Хуманост
Граѓанската новинарка Симона Живкова од Штип направи видео сторија за новиот Дом за деца „Емануел“ во Радовиш. Видео сторијата „Од сон до реализација: Дом за деца без родители во Радовиш“ можете да ја прочитате на clp.mk, како и да дознаете повеќе за граѓанското новинарство и активизам како можност да се биде дел од општествените промени.
Б. Јордановска
