Договор од Преспа
Грчкиот премиер Алексис Ципрас му честиташе на македонскиот премиер Зоран Заев за одобрувањето на уставните амандмани потребни за промена на името. Тој ја изрази и неговата волја да се бори за договорот во грчкиот парламент.
„Дозволете ми, во овој момент, за првпат по Договорот во Скопје, да му честитам на премиерот на Северна Македонија, Зоран Заев, за храброста што ја покажа од самиот почеток до крајот на овој процес“, рече Ципрас.
Оставката на грчкиот министер за одбрана Панос Каменос и ставот на Независни Грци да не го гласаат договорот од Преспа, само за кратко внесоа немир кај политичката елита во земјава. Премиерот Ципрас, кој побара да се гласа за доверба на неговата влада, неофицијално има обезбедено мнозинство во парламентот, што би значело дека ќе го преживее гласањето за доверба и ќе се изгласа решението за името. Тоа, според најавите, треба да се случи кон крајот на месецот со што завршува најголемиот дел од обврските по Преспанскиот договор.
Комисијата за политички систем ја прифати иницијативата на Тодор Петров, за собирање потписи за распишување на нов референдум за името, со прашањето „Дали сте за Република Северна Македонија?“, со 8 гласа „за“ и еден воздржан.
„Со измената на Уставот со амандманот 33 направен е обид за промена на името согласно со спогодбата Димитров-Коѕиас која де јуре не постои“, рече Петров.
Според него иницијативата е уредна, покрената на предлог на 179 граѓани и ги исполнува сите услови согласно Законот за референдум.
Претседателот на Собранието треба да даде мислење ако иницијативата на Петров е уредна, откако ќе ја извести ДИК и подносителот има рок од три месеци да собира потписи.
Најдоцна до 2024 година во личните документи на граѓаните ќе стои новото име „Република Северна Македонија“. Со новите амандмани во нив ќе биде наведена и етничката припадност на малцинските заедници во државата.
Најдоцна во рок од пет години откако ќе биде ратификуван Договорот за името во грчкиот Парламент, граѓаните ќе треба да си набават нови лични документи и нови ознаки на регистарските таблички за нивните возила.
СЈО
Во Кривичниот суд од утре продолжуваат судењата на СЈО, каде за неделава се закажани вкупно пет нови рочишта за случаите „Тендери“, „Т.Н.Т“, „Транспортер“, „Монструм“ и „Насилство во општина Центар“.
Предметот „Талир“ оформен по одобрен обвинителен акт на СЈО, со АКМИС системот е распределен кај судија Осман Шабани, информира денеска Основниот суд Скопје 1 – Скопје.
Судијата Осман Шабани ги води предметите „Титаник“, „Топлик“ и повторената постапка за „Монструм“.
#Перспективи2019
ЦИВИЛ Медиа продолжи со објавување на серија интервјуа и текстови со кои ја рекапитулира политичката и општествената реалност на годината што изминува и се обидува, преку разговори со избрани експерти и јавни личности да ги открие перспективите на претстојната година.
Пред јавноста сега е новиот серијал „Перспективи 2019“ во кој за сега може да ги погледнете ставовите на Розета Трајан, Мирјана Малеска, Мерсиха Смаиловиќ, Мирјана Најчевска, Хусеин Адеми, Марта Гусар, Фатон Алити и Сашко Попоски.
А. Петровска
