Од ВМРО ДПМНЕ сметаат дека објавувањето на Законот за јазици и Законот за ратификација на спогодбата од Преспа, без потпис на претседателот Иванов, а со потпис на Талат Џафери е противуставно. Тие ќе поднесат кривична пријава против претседателот на Собранието, Талат Џафери, и против директорот на Службен весник, Мартин Костовски. Од партијата бараат Уставниот суд да пресече и да оцени дали објавувањето на законот за јазици е согласно Уставот и повикуваат на бојкот на законот.
Реакција пристигна и од кабинетот на претседателот Ѓорѓе Иванов.
“Објавувањето на Законот за употреба на јазиците и на Законот за ратификација на спогодбата од Преспа во Службен весник без потпис на указ од Претседателот на Република Македонија се противуставни.
Со доставувањето на овие два закона во Службен весник е прекршен член 75 од Уставот на Република Македонија, додека објавувањето на законите е направено незаконски и претставува основа за кривично гонење.
Ова е момент кој ќе покаже дали во Република Македонија постои Уставен суд, дали функционира обвинителството, дали има независно судство и дали постои владеење на правото.
Се прашувам, дали високите претставници на меѓународната заедница, кои ја поддржуваат оваа владина коалиција, ќе се јават и ќе го поддржат овој начин на донесување на закони?
Дали ќе ги поддржат овие преседани, што носат несогледливи последици и штета по правото и правната држава и дали вакви преседани применуваат во сопствените држави?”, стои во соопштението на Иванов.
Претседателот на Собранието на Република Македонија на денешната прес-конференција за Указот за Законот за употреба на јазици и Указ за Законот за ратификација на Преспанскиот договор, нагласи дека и двата Укази се доставени во Службен весник со дополнително објаснување зошто Указот е потпишан само од негова страна.
„Од почеток на постапката за донесување на Закон за јазици сум тврдел дека сум постапил во рамките на постапките и процедурите во Уставот и на Деловникот. Може да се смета дека е злоупотребена службената должност со нетпотпишувањето на законот од страна на претседателот. Според членот 8 од Уставот направена е поделба на власта на законодавна, извршна и судска. Претседателот е дел од извршната власт и не може да се меша во делот на законодавната власт и да не ја исполнува својата обврска”, одговори Џафери на прашањето од новинар за тоа дали чувстува одговорност и дали смета дека го прекршил Уставот.
Овие реакции се по синоќешното објавување на Законот за јазици и Законот за ратификација на Конечната спогодба, за престанување на важноста на Привремената спогодба од 1995 година и воспоставување на стратешко партнерство помеѓу страните.
Ј. М. П.
