„Инсистираме на воздржување од етнички провокации и ги осудуваме сите провокации и агресивно однесување кое претставува закана за стабилноста и мирот, имајќи на ум дека мирот не може ниту да се гради, ниту да се одржува, ако е базиран на националистичка, популистичка и радикална реторика. Апелираме дека вадењето на контроверзи од минатото, нема да им помогне на земјите во регионот да се движат напред по нивниот европски пат, туку популизмот и национализмот само ќе ги деконцентрира“, се дел од клучните пораки во драфт-резолуцијата за Западен Балкан од конгресот на Европските народни партии на Малта.
Резолуција за земјите од Западен Балкан, меѓу кои и Македонија, треба да биде усвоена на конгресот на Малта. На средбата присуствува и Емил Димитриев, во својство на премиер кој доаѓа од десничарска сестринска партија, но и Никола Груевски како дел од делегацијата на Македонија, во засега неразјаснето својство. Според „Дојче Веле“ на македонски јазик, „и покрај повеќе барања до првите луѓе на ЕПП и нејзините портпароли, досега никој не сакаше да одговори на прашањата поврзани со учеството на делегацијата на ВМРО-ДПМНЕ на конгресот“.
Сепак, како присутен, лидерот на ВМРО-ДПМНЕ, можел и лично да ја слушне декларација на Европските народни партии, во која се вели дека документот: „Ги охрабрува сите политички фактори да земат целосен удел во демократските процеси и институции на нивните земји и да се фокусираат на структурни реформи кои на нивните економии ургентно им требаат. Ја повторува потребата и ургентноста на Западен Балкан да се движи напред кон судските реформи и да ги етаблира владеењето на правото и независното и транспарентно судство. Повиците за процесот на декриминализација на политичкиот естаблишмент да бидат зајакнати. Силно препорачува земјите од Западниот Балкан да ги интензивираат нивните напори во борбата со корупцијата на сите нивоа, вклучувајќи ги политиката и општеството, со нула толеранција“, се вели во драфт-резолуцијата.
Со нацрт-документот, меѓу другото, се изразува и силна поддршка за слободата и независноста на медиумите, како еден од клучните столбови на демократските општества. Европските народни партии се загрижени за состојбата на медиумите, и остануваат посветени на медиумскиот плурализам и професионализам во регионот.
