Потребно е да се промени перцепцијата за Собранието и да се врати контролната улога врз работата на Владата. За тоа да се случи, неопходно е да постои политичка волја, а моменталното парламентарно мнозинство има желба да биде критичар на работата на извршната власт. Ова е ставот на претседателот на Собранието, Талат Џафери, кој денеска ја отвори дебатата „Засилување на улогата на Собранието – Помеѓу реформите и политичката волја“.
„Перцепцијата зависи од транспарентноста на Собранието и од работата на секој пратеник. Неретко се случува власта и моќта да го расипе човекот. Затоа, треба да обезбедиме вистински механизми каде ќе имаме владеење на правото и високо развиена политичка култура и свест и одговорност, за да се превенира злоупотребата на таа моќ. Треба сите заедно, ако ја сакаме оваа наша држава, ако сме одговорни за сегашноста но и за иднината на генерациите што доаѓаат, треба со сиот свој капацитет да работиме на остварување на овие принципи! Одговорноста пред сè, врз нас кои сме добиле мандат од граѓаните да ја водиме државата, но одговорност имаат и другите општествени субјекти, а и секој поединец како граѓанин“, истакна Џафери.
Тој уште еднаш ја потврди заложбата за соработка и комуникација со граѓанскиот сектор, со стручната јавност и со граѓаните, како важен сегмент кога за функционирањето, транспарентноста и отвореноста на законодавниот дом.
На дебатата учествуваа повеќе претставници на граѓанскиот сектор, сегашни и поранешни пратеници од пратеничките групи во Собранието. На поканата за учество не одговорија пратениците од опозиционата ВМРО-ДПМНЕ.
Од Институтот за демократија „Социетас Цивилис“, како организатори на настанот, ги презентираа мерките предвидени во планот за итни демократски реформи, документот – Блупринт, подготвен од граѓанскиот сектор во 2016 година.
Марија Саздовски од Платформа на граѓански организации за борба против корупцијата, зборуваше за исчекорот што тие успеаја да го направат со присуство на Комисијата за политички систем и односи со заедниците, во делот на надзорот на работата на Државната комисија за спречување на корупција (ДКСК).
„ДКСК е должна да поднесе годишен извештај до Собранието, до Владата и до претседателот на државата, што се усвојува без учество на експерти на граѓанските организации. Нашиот предлог е Собранието да не го усвои последниот извештај и да го врати на дополнување“, вели Саздовски.
Дебатата е организирана во рамките на долгогодишното следење на работата на Собранието од Институтот за демократија “Социетас Цивилис”, со поддршка од Цивика Мобилитас.
Марија Теговска