На денешниот настан на ЦИВИЛ, „Слободни избори: научени лекции“, на кој се промовираше извештајот од долгорочниот мониторинг на локалните избори во 2017, се обрати заменик амбасадорот на Сојузна Република Германија, Марко Акватичи.
„Дозволете да кажам дека ова не е првиот проект на ЦИВИЛ којшто финансиски е поддржан од германската влада. На пример, проектот „Слободни избори за слободни граѓани“, со кој ЦИВИЛ веќе успеа да придонесе кон промени во перцепциите за различни аспекти од изборниот процес и во подигнувањето на јавната свест за гласачките права“, рече Акватичи.
Потсетувајќи ги присутните на германскиот Устав и основните закони на Германија, Акватичи наглади дека изборите не се работа на државата и на владата.
„Да потенцирам дека Германија секогаш ќе биде доверлив партнер на граѓаните на Македонија на патот кон европската интеграција и приклучувањето кон НАТО. Од таа причина ќе продолжиме да ги поддржуваме сите коишто делуваат во името на оние од коишто потекнува вистинската моќ, односно македонските граѓани“, истакна тој.
„Би сакал да му се заблагодрам на ЦИВИЛ и Вам лично, за вашиот неуморен труд и сите напори за зајакнување на демократијата и слободата во државата“, заклучи Акватичи.
Маја Ивановска
Камера: Атанас Петровски
Монтажа: Ермин Климента
Фотографија: Биљана Јордановска
