Сеприсутната „дестабилизација“ на државата, реалност или теорија(ии) на заговор сè уште е актуелна тема во јавноста, но можеби повеќе во медиумите. И додека едните заговараат дестабилизација, другите обвинуваат дека со тој наратив се прави обид за дестабилизација, обвинетите гарантираат дека се миротворци.
Во контекст на едните -ВМРО-ДПМНЕ, другите-СДСМ и третите -ДУИ, а со цел да се разјаснат дилемите, но и реално да се пристапи кон она што значи или би значело „дестабилизација на државата“, Жарко Трајаноски, ИМА, во две свои анализи пристапува кон укажување на фактите за „дестабилизирање“, пред сè во медиумскиот простор.
Во анализата „Тема на неделата: „Дестабилизација“ – реална закана, политичко пророштво, или теорија на заговор?“, Трајановски најпрвин го факторизира медиумската манипулација со „дестабилизацијата“.
„Иако премиерот изнесе непотврдени „информации“ кои се однесуваат за иднината, некои медиуми почнаа да известуваат за обиди за дестабилизација во сегашно време. На пример, во насловот на „Вечер“ „По најавите на ДУИ за дестабилизација, стручњаците коментираат: На секој повик за уривање на уставниот поредок, треба соодветно да се одговори“ (05.08.2024), се инсинуира дека ДУИ веќе најавила дестабилизација и дека веќе имало „повик за уривање на уставниот поредок““, се вели во анализата на Трајаноски.
Понатаму, Трајановски, во отсуство на факти, вели дека прашање за „дестабилизација“, со кое е преокупирана јавноста последнава седмица, е хипотетичко прашање кое може да се сведе на трилемата: дали станува збор за реална закана од дестабилизација, за теорија на заговор заради пропагандни цели, или пак ВМРО-ДПМНЕ повторно ја ангажирало „гатачката на Груевски“ за предвидување на иднината?
Заклучокот е дека целата оваа хаотична ситуација со „заканите од дестабилизација“ е резултат на несоодветната комуникација со јавноста на премиерот за тема од врвен национален интерес како што е безбедноста, преку споделување на непроверени информации.
Во втората своја анализа „Дестабилизација“ или манипулација заради поларизација: Како да известуваат медиумите за обвинувања за „дестабилизација“ на државата?“, Трајаноски го таргетираше медиумското известување и како новинар(к)ите можат да им помогнат и на граѓаните (да ги добијат информациите од јавен интерес), и на институциите (надлежни да ги спречат евентуалните обиди за дестабилизација на државата).
„Во име на јавниот интерес, медиумите и новинар(к)ите имаат должност да го „разбијат“ молкот на надлежните институции, особено откако премиерот упати експлицитно обвинување кон ДУИ како „сериозен фактор за дестабилизирање на регионот и Македонија“. Исто така, медиумите и новинар(к)ите имаат должност да не ја продлабочуваат политичката и општествена поларизација при известувањето за чувствителни теми, како што се обвинувањата за дестабилизација на државата. Поставувањето на клучни новинарски прашања од јавен интерес, и настојувањето да се добие релевантен одговор од надлежните институции, е професионална обврска на новинар(к)ите“, се вели во анализата.
Б. Ј.
