Проф. д-р Оливер Андонов упати нова серија прашања до министерот за одбрана Владо Мисајловски, овојпат за набавката и одржувањето на вооружувањето и воената опрема, реализацијата на плановите за модернизација на Армијата, меѓународниот статус на Воената академија и нејзините наставни програми.
Во објава на Фејсбук, насловена како „неколку викенд прашања“ за министерот, Андонов најнапред го отвора прашањето што конкретно се разговарало на средбите на Мисајловски со економскиот советник и воениот аташе на САД во Северна Македонија.
„Дали министре покрај протоколарните средби со економскиот советник и воениот аташе на САД во Македонија разговараше и за набавка на вооружување и опрема согласно десетгодишниот план за модернизација на АРМ кој завршува до крајот на 2027 година?“, прашува Андонов.
Тој дополнително го поставува прашањето дали со претставниците на САД, како стратешки партнер на земјата, се разговарало за изградба и опремување ремонтни капацитети за возилата „Страјкер“ и JLTV, како и за обука на персонал за нивно одржување и ремонт.
Според Андонов, прашањата за големите набавки и долгорочното одржување на воената опрема не треба да останат ограничени на протоколарните соопштенија на Министерството за одбрана. Тој смета дека за ваквите процеси е потребна стручна и академска јавна дебата. Како пример ја посочува Хрватска и јавната дискусија околу нејзините набавки на ракетни системи за копнени дејства.
Прашања за регионалниот статус на Воената академија
Вториот блок прашања се однесува на Воената академија „Генерал Михаило Апостолски“, каде што Андонов е редовен професор.
Тој го отвора прашањето за школувањето странски питомци, конкретно од Црна Гора, и изразува загриженост за идниот регионален статус на Академијата.
„Што ќе преземеш во врска со очигледното откажување на школување на питомци од Црна Гора и очигледно губењето на статусот на Воената академија како регионална НАТО Воена академија?“, прашува Андонов.
Станува збор за оценки и тврдења што Андонов ги изнесува во својата објава, при што од министерот бара одговор за состојбата со меѓународната соработка на Академијата.
Тој истовремено упатува критика кон начинот на кој Министерството комуницира со јавноста, оценувајќи дека краткорочните ПР-активности не можат да ја заменат долгорочната развојна политика.
„Резултат дава сериозна планска развојна активност која нема да има резултат во истиот миг за да се фалиш по социјални мрежи, но ќе има резултат на среден и особено на долг период“, пишува Андонов.
Критика за наставната програма
Професорот на Воената академија го отвора и прашањето за промени во студиската програма, особено за воведувањето на предметот „Методика на физичко образование“.
Андонов нагласува дека физичката подготвеност е исклучително важна за воениот персонал, но го доведува во прашање местото на ваков предмет меѓу задолжителните академски предмети за идните офицери.
Според неговиот став, приоритет треба да имаат содржините директно поврзани со борбената подготовка, промените во природата на современото војување и развојот на воените доктрини.
Тој потсетува и дека Воената академија не е потчинет орган на Министерството за одбрана, но дека постои законска и професионална потреба од координација на наставните програми со потребите на Армијата.
Во тој дел од објавата Андонов употребува и сарказам:
„Што мислиш да воведеме предмет Хортикултура? Тамам офицерите на АРМ ќе се разбираат во одгледување цвеќиња на мирот и уредување градини.“
Зад саркастичната забелешка, Андонов предупредува дека, според него, несоодветните развојни политики може долгорочно да ја загрозат и меѓународната соработка на Воената академија.
„Потоа да не се чудиме кога по 20 години ќе ни ја прекинат меѓународната соработка, а тоа е на наша штета“, пишува тој.
И прашањето за платите и почитувањето на законите
На крајот Андонов го отвора и прашањето за платите на Воената академија. Тој тврди дека Министерството ќе мора да го решава тоа прашање согласно Законот за високо образование и обврските што произлегуваат од Законот за Воена академија.
Притоа упатува и предупредување дека неспроведувањето закон може да повлече одговорност.
„А неспроведувањето на Закон повлекува кривична одговорност, па колку сакаш биди министер и власт“, пишува Андонов.
Објавата ја завршува со директен повик до Мисајловски да одговори јавно на поставените прашања и да прифати дебата за состојбите во одбраната.
„Ете министре подразмисли, консултирај се доколку имаш со кого и одговори ако имаш храброст јавно да дебатираш, надвор од ПР протоколот“, порачува проф. д-р Оливер Андонов.
Зад остриот тон и сарказмот во објавата, Андонов отвора суштински прашања за одбранбената политика: што следува по набавката на новата опрема, дали постојат домашни капацитети и кадар за нејзино долгорочно одржување, каква е иднината на Воената академија и колку нејзините програми ги следат промените во современото војување. Тоа се прашања што, независно од политичката полемика, заслужуваат јавен и стручен одговор.
ЦМ Деск
Неопходна е вашата поддршка за ЦИВИЛ.
Поддржете ги независните медиумски платформи на ЦИВИЛ во борбата против дезинформациите, национализмот, хибридните закани и авторитаризмот
Дајте го својот придонес СЕГА.
