Заменик директор на Бирото за јавна безбедност, Ариф Асани, зборува за тоа која е врската меѓу нелегалната трговија со оружје со организираниот криминал во земјата и регионот и кои се успесите и предизвиците на МВР во однос на оваа тема. Разговорот со заменик директор на БЈБ, Асани, е дел од активностите на проектот на ЦИВИЛ „Минатото, сегашноста и иднината на контролата на оружјето во Република Северна Македонија“ со поддршка од Глобалната иницијатива против транснационалниот организиран криминал и Резилиенс фонд.
„Недозволената трговија со оружје ги поддржува и поттикнува сериозните облици на организираниот криминал. Нелегалното оружје се пушта во незаконски промет на илегалниот пазар, а покрај активностите за прибавување материјална корист, нелегалното оружје се користи и како средство за уцена и заплашување при извршување на други кривични дела, со што, истото се појавува кај повеќе облици на организиран криминал, и е присутно кај организирани криминални групи кои користат насилство или се покриминални.
Врската на нелегалното оружје е посебно изразена со организираните облици на недозволената трговија со дрога, каде организираните структури оружјето го користат како средство за заштита и демонстрирање на моќ.
Во 2021 година, сузбиена е десетчлена полукриминална организирана група, која првенствено се занимавала со недозволена трговија со дрога, при што, четворица членови од истата биле инволвирани и во вршење на недозволена трговија со оружје и муниција.
Во делот на организираните облици на недозволената трговија со оружје, во 2019 година, сузбиена е организирана криминална група која се занимавала со недозволена трговија на оружје и муниција, при што, во рамки на истата, откриена е и работилница за конвертирање пиштоли за звучна и светлосна сигнализација.
Предизвиците за справување со недозволената трговија со оружје, се издигнати на ниво на приоритет на Бирото за јавна безбедност, за што насочено се преземаат мерки и активности кои се поврзани со превенцијата и справувањето со криминалот од овој домен.
Заканите од недозволената трговија со оружје се анализираат и како посебна СОК област во рамки на новата Проценка на закани од организиран и сериозен криминал – СОКТА 2021 година.
Во оваа насока, ве информираме дека предметниот документ треба да биде финализиран до крајот на годината, по што истиот ќе биде јавно објавен и достапен на веб страната на МВР“, истакна Асани.
Дехран Муратов
фотографија: МВР
