Универзитетската професорка Јасна Бачовска на панел дискусијата „Слободни избори наспроти црна пропаганда“ во организација на ЦИВИЛ, изјави дека проблемот со лажните вести и пропагандата е голем и глобален проблем и во меѓународната политика.
Таа вели дека најчесто како пример вакви манипулации најчесто слушаме за Америка, а многу помалку се спомнуваат европските земји.
Според Бачовска, во нашиот медиумски систем нема интегритет.
„Европските вредности велат не ги регулирајте медиумите, оставете на саморегулација, новинарството е отворена професија, секој може да отвори портал и ние не можеме ништо да направиме. Во поглед на регулација многу малку можеме да направиме, мораме да работиме на интегритет на медиумите. Во Македонија не се покажа политичка волја да се зајакне медиумскиот сервис, во ниедна влада, и немаме квалитет на медиумите“, изјави Бачовска.
Бачовска вели дека дури и утринските емисии кои ги гледаат граѓаните на телевизиите немаат никаква структура на програмите, нема емисии во кои ќе се зборува за владеење на правото, едукативни содржини или култура, па на граѓаните им останува да ги читаат порталите и да одлучат на кого ќе веруваат.
„Граѓанското општество може да направи нешто, преку вакви аларми, да се запрашаме на која публика и се обраќаме“, додава Бачовска.
Професорката Јасна Бачовска своето излагање го продолжи со нејзините очекувања за она што ќе се случува во однос на овие теми во наредниот период до изборите.
„Сега, со оглед на тоа што имаме техничка влада мислам дека ќе имаме добро реалзиран изборен процес“, вели Бачовска.
Во однос на медиумскиот дел таа не очекува некои големи промени.
„Од тој аспект имајќи предвид се што се случуваше за време на референдуот и претседателските избори не верувам дека овој пат ќе биде нешто поразлично. Политичките партии може да направат многу, односно да ја канализираат политичката дебата на социјалните мрежи. Мислам дека треба да покажат ниво на политичка одговорност. Но знам нема да покажат. Гледаме каква реторика се артикулира. Гледајќи ја таа реторика, тоа ја навестува целата прљавштина која ќе се артикулира во наредниот период“, смета Бачовска.
„Нормално е дека се чувствува разлика во слободата на медиумите сега и за време на режимот. Меѓутоа, можеби новата влада не ги артикулира и не врши притисоци врз медиумите, но како општество треба да се работи уште многу. Тоа е многу долг процес. Ние имаме многу ниско ниво на медиумска писменост. Истражувањата покажуваат дека сме патријахално општество, и дека граѓаните се информираат од дебатните емисии кои имаат многу големо влијание врз јавното мнение. Лидери во информирањето станаа дебатните емисии“, заклучува Бачовска
А. Петровска / М. Ивановска