Арбитражниот суд во Хаг пресуди во корист на Словенија во пограничниот спор со Хрватска и одлучи земјата да добие контакт на своите територијални води со меѓународното море.
Според одлуката, Словенија доби три четвртини од Пиранскиот Залив, но не доби излез во меѓународни води, туку премин низ дел од хрватските територијални води. Коридорот до меѓународни води е широк околу 2.5 наутички милји и словенечките бродови и авиони ќе имаат слободен премин низ хрватското подрачје.
Арбитражниот суд во Хаг наведе дека копнената граница меѓу Словенија и Хрватска во голем дел не е спорна.
Хрватска утре нема да испрати свои официјални претставници во судницата на читање на одлуката за територијалниот спор со Словенија за границата во водите на Пиранскиот Залив и официјален Загреб одбива да ја испочитува одлуката на Постојаниот арбитражен во Хаг. Хрватска на оваа одлука нема да ѝ придава никаква важност, објави ХТВ, повикувајќи се на извори на Министерството за надворешни и европски работи. И хрватскиот премиер Андреј Пленковиќ, повикувајќи се на законските норми, според кои за арбитражната одлука нема механизам за присилно извршување, а на страните во спорот им се допушта доброволно спроведување на одлуката, беше дециден дека одлуката на судот во Хаг „во никој случај не ја обврзува” неговата влада, која нема намера да ја имплементира одлуката.
Словенија ќе ја почитува одлуката на арбитражата, но исклучува нови преговори за решавање на спорот, изјави во понеделникот словенечкиот премиер Миро Церар.
„Очекувам да го стори тоа и Хрватска. Мојата влада е подготвена за различни сценарија, кога ќе дојде Денот Д за Словенија“, изјави Церар. Тој денеска, по објавувањето на одлуката, на прес-конференција во Љубљана изјави дека се работи „за историски момент за Словенија“.
