Студентите кои дојдоа од повеќе градови во Србија да протестираат во Белград на 15 март се блиску до својата цел. Вечерва ќе им биде приреден дочек во центарот на градот. Студентите во блокадата на својата страница на Инстаграм објавија дека утрешниот протест во Белград ќе започне во 16 часот пред Собранието на Србија, пренесува Н1.
Локацијата на вечерашниот дочек ќе биде Теразија со почеток во 19 часот. Првиот пречек на велосипедистите е планиран да започне во 19 часот и 30 минути, а последниот групно пречек на пешаците е планиран во периодот од 21:45 до 22:45 часот.
Студентите од сите делови на Србија – вклучувајќи ги Крагуевац, Ниш, Трстеник, Краљево, Ужице, Крушевац, Вршац, Чачак, Љиг – доаѓаат во Белград пеш или со велосипеди.
Поставените транспаренти се со пораки: „Пумпа“, „Економски тигар“, и истакнати српски знамиња и транспаренти на факултетите.
На студентите им се придружија бројни граѓани и група која за срpски ФоНет изјави дека се „воени ветерани на Србија“.
Ветераните најавуваат дека утре ќе дојдат во уште поголем број.
Блокирани за сообраќај се централните белградски улици околу Теразије и од Теразије до Славија.
Паралелно со студентскиот марш, околу Паркот Пионер, каде што „кампуваат“ таканаречените „студенти кои студираат“ беа паркирани и трактори.
Српскиот претседател Александар Вучиќ денеска изјави дека државата ќе преземе мерки за обезбедување на протестот најавен за 15 март во Белград, но истакна дека целосната одговорност ќе биде на организаторите.
Вучиќ нагласи дека протестот не е пријавен кај надлежните институции и дека државата ќе помогне во неговото обезбедување, но предупреди дека секој што ќе се обиде да го наруши јавниот ред и мир ќе биде уапсен.
– Секој што ќе нападне демонстранти ќе биде уапсен, а истото ќе важи и за учесниците на протестот кои ќе нападнат други граѓани или институции, рече Вучиќ.
Тој ги повика безбедносните служби да не применуваат сила без неопходност и додаде дека сите лица кои, како што рече, „планирале насилно влегување во институции“, ќе бидат уапсени.
Новинарска екипа на сплитскиот весник „Слободна Далмација“ денеска не беше пуштена во Србија, под образложение дека претставува безбедносен ризик, објави весникот на својот портал.
Екипата патувала за Белград за да известува од големиот студентски протест што е најавен за утре, пренесува Бета.
Според „Слободна Далмација“, српската полиција ги застанала на граница, ги издвојила настрана и им ги зела документите. Откако утврдила дека се новинари, им било врачено решение за забрана на влез во земјата.
Весникот, повикувајќи се на неофицијални информации, наведува дека и други новинарски екипи од Хрватска добиле забрана за влез во Србија, со цел да не известуваат за протестот.
Српската полиција во петокот му забрани влез во земјава и на словенечкиот новинар Марко Грегорац од ПОП ТВ, објави неговата колешка новинарка Жига Бонча на социјалната мрежа Х.
Ј. Ѓ.
