„Како што знаете корупцијата е навлезена во сите пори, стана начин на живеење, што е многу страшно, тоа е она ситната корупција би рекла. Уште пострашна е законската корупција , каде што се очекува да дадеме свој придонес, меѓутоа не сме единствената институција во таа алка, треба и другите институции кои ги подготвуваат законските решенија, па да ни ги достават за да направиме антикорупциска проверка на легислативата“, истакна Билјана Ивановска , претседателка на Државната комисија за борба против корупција и судир на интереси на конференцијата на ЦИВИЛ „Перспективи 2021“.
„Основен чекор што треба да се направи во борбата против корупцијата е борбата на личноста сама со себе, борбата за интегритет, за професионалност, борбата за законито работење и слично. Интегритетот на една личност и нејзиното професионално работење може да почне да гарантира дека нешто позитивно може да се случува во државата . Сѐ додека приватниот интерес е оној кој што раководи и ги поврзува луѓето без оглед на партиска или било каква припадност патот е зацементиран. Треба да се зголеми нивото на свеста кај граѓаните дека никому ништо не должи. И нивото на совест кај оние што извршуваат јавни функции дека никој ништо не им должи.
Проблемот со вработувањата и дискреционите овластувања е еден голем проблем во општеството што сите ги засега, меѓутоа којшто гарантира тонење на државата бидејќи не овозможува квалитетни, професионални и компетентни луѓе да дојдат на одредени работни позиции.
Многу често укажувавме и на судир на интереси. Би го спомнала последното мислење што го дадовме за забраната за вршење на дејност на Куштрим Рамадани којшто се именуваше а директор во МЕПСО. Се најдовме во еден расчекор би рекла дека мислењето на ДКСК како да не се почитува во целост/ Искрена да бидам не сакам да верувам во тоа бидејќи има уште простор и за дискусија и за дообјаснување од наша страна. Меѓутоа во оваа прилика би сакала да кажам дека ДКСК е надлежна за спроведување на законот за спречување на корупција и судир на интереси. Ние не можеме некому да му кажеме на сила да го примени нашето мислење. Меѓутоа ние даваме мислење врз основа на закон кој што е усогласен со европската регулатива и се очекува европски да се однесуваат и избраните и именуваните лица.
Наредната година ќе се соочиме со нашите три предизвици: обезбедување на автоматска обработка на процесите во нашата институција, оној фамозен софтвер кој трета година ќе почнеме да го зборуваме, за кој пред два/три дена добивме согласност од Владата за повеќе годишна јавна набавка и се надевам дека тој процес ќе го завршиме; доекипирање – за првата половина од годината добивме согласност од Министерството за финансии да вработиме 8 нови вработени , а нашето барање беше 16; обезбедување на соодветни просторни услови – прашање кое до ден денеска не се реши иако имаше донесена одлука дека ДКСК треба да се пресели во просториите определени за тоа.
Ќе продолжиме по патот што веќе го трасираме две години. Искуството се калеми од ден во ден. Тука е јавноста, тука сте вие граѓанските здруженија, тука е Платформата со која одлично соработуваме , медиумите и мислам дека имаме поддршка за нашето транспарентно произнесување пред јавноста и мислам дека луѓето ја препознаваат искреноста и професионалноста и желбата нешто да направиме и да дадеме придонес во ова општество. Ни значи секоја поддршка. Заедно сите ќе може да застанеме на браникот на борбата против корупцијата“, истакна Ивановска.
обработка на текст: Б. Ј.
монтажа: Ариан Мехмети
