Договорот со „Бехтел и Енка“ ќе остане во историјата како еден од проектите што значително ќе ги промени однесувањето и навиките на градење инфраструктурни капитални инвестиции, рече вицепремиерот за економски прашања Фатмир Битиќи во гостувањето во ТВ21. Тој додаде дека на почетокот на 2028 година граѓаните ќе се возат по новите автопати.
„Јас сум убедливо уверен дека тоа што денеска се потпиша ќе се испорача во дадениот временски период и веќе почетокот на 2028 година ќе возиме по сите наведени делници, а тоа е целиот Коридор 8 со автопатско решение, а Коридорот 10-Д, односно Прилеп-Битола исто со автопатско решение и тоа значи дека Скопје ќе биде поврзано со западен дел со модерни автопатски решенија, коишто би требало да донесат поголем економски развој“, рече Битиќи.
Тој додаде дека за првпат на овој начин со фирма ќе се гради автопат кај нас, односно со проектирање и изведба на компанијата.
„Сите недостатоци ќе ги земе изведувачот на свој товар и ова е увертира во нов начин на градење автопатски решенија и тоа е покажано како добар модел не само во регионот, но и пошироко. Исто така е договорот историски, бидејќи висината на договорот е исто голема, односно околу 10% од бруто-домашниот производ. Во самиот договор е укажано дека најмалку 51% мора да бидат домашни изведувачи, што значи дека ќе осигураме најмалку еден процент раст на БДП заради ова автопатско решение, под претпоставка дека само 50 проценти најмалку ќе бидат домашни подизведувачи. Сметам дека многу повеќе ќе бидат домашните подизведувачи. Ова ќе биде дополнение на севкупниот развој што го планираме“, истакна вицепремиерот.