Секој бара поединечно решение за раст на платите, но ние рековме дека ни треба системско решение за сите. Блиску сме до утврдување на методологијата и се закажува економско-социјалниот совет кој ќе биде отворен за јавноста за да се види за што дискутираме, изјави вицепремиерот за економски прашања Фатмир Битиќи за МТВ.
Тој додаде дека Владата нуди методологија што ќе биде одржлива, со период на прилагодување, но и јасна цел за тоа до каде ќе стигнат платите во јавната администрација.
Нема магичен стап, истото го кажав и за време на ковид кризата. Не може да се решат сите проблеми за 24 часа. Треба трпение, дијалог и консензуални решенија кои ќе бидат одржливи, рече Битиќи.
Вицепремиерот истакна дека цела година Владата бара системско решение и дека со синдикатите минатата година ќе се постигнеше решение, доколку тие не го прекинеа дијалогот, бидејќи сметале дека штрајковите се поважни од дијалогот.
