Со формирањето на 10 пратенички групи и избор на исто толку координатори, ВМРО-ДПМНЕ ќе предизвика целосна блокада на работата на Собранието! Ова е оценка на правниот експерт на ЦИВИЛ – Центар за слобода, Александар Новакоски, за кого дури и актуелната атмосфера во парламентот е вонредна.
„Имајќи предвид дека по конституирањето на парламентот долго време се калкулираше со изјаснување на пратениците, јасно беше дека коалицијата што ја предводеше ВМРО-ДПМНЕ со други политички партии, се подготвува некоја ситуација, изигрување на Деловникот. И, еве, тоа се случи! Дали формирањето на 10 пратенички групи, како основа, произлегува од Деловникот? Тоа секој може различно да го толкува. Јас немам посебни податоци за тоа, како пратениците се изјасниле по верификацијата на мандатите. Дали се изјасниле дека ќе дејствуваат, во која рамка ќе дејствуваат и во која политичка партија, бидејќи тие се од листата на кандидати на коалицијата. И, за да бидам појасен: долго време не го дефиниравме поимот ‘коалиција’, преку сите мои забелешки што сум ги давал јавно и преку некои толкувања. И сега, сето тоа се одразува и во овој случај“, изјави Новаковски, за ЦИВИЛ Медиа, коментирајќи ги последните чекори на најголемата опозициона партија во парламентот, ВМРО-ДПМНЕ.
Како што вели, формирањето на 10 пратенички групи, им дава многу можности за опструирање на работата на Собранието. Според Новаковски, пет пратеници согласно со Деловникот, може да поднесат интерпелација и потоа, може да го злоупотребуваат тоа право во повеќе наврати, да се јавуваат за збор повеќе пати…
„Значи, постои можност, буквално да се блокира парламентот и тоа, во недоглед! Пред нас се локалните избори. Парламентот мора да донесе многу битни закони и измени на закони, што е нормално, секоја влада што ќе дојде, има своја програма… Во конкретниот случај, не можам да тврдам како ВМРО-ДПМНЕ ќе се однесува. Но, потезите, настаните, ми даваат за право да сметам дека Собранието се соочува со многу тежок период, и дека може законодавниот дом да се злоупотребува. Како генерален секретар, сум бил и сведок на такви настани, со крајни напори се спречуваа инциденти, со крајни напори се спречуваше напнатоста во парламентот“, додава Новакоски.
„Сепак, ова се првите 100 дена од работата на новата Влада. Очекувам да се испочитуваат, а потоа, очекувам атмосферата комплетно да се смени и ќе има големи опструкции. Сме имале седници и по 20 часа, за носење битни закони што произлегуваа од Рамковниот одговор и сето тоа го координиравме со стариот Деловник, но сѐ се координираше на координации. Замислете сега, како претседателот на Собрание, ќе ги искоординира сите координатори. Не знам дали има потпретседатели. Морам да кажам дека целата оваа атмосфера за мене е исклучително сомнителна, а наизглед и вонредна“, оценува за ЦИВИЛ Медиа правниот експерт Новакоски.
Моника Талеска
Камера: Дехран Муратов
