Бошњачкиот истражувачки центар – LILIUM BOSNIACUM од Скопје, денеска ја промовираше својата прва публикација „Интеграција на Бошњаците во општеството“, во просториите на ГЕМ-клубот.
Во публикацијата се сумирани резултатите од истражувањето коешто е спроведено на територијата на Република Македонија, за правичната застапеност на Бошњаците во државните институции, како и резултатите од спроведената анкета, на која учествуваа 1200 испитаници-Бошњаци за предизвиците и проблемите со кои се соочува бошњачкото население во земјата.
„Од информациите што ги добивме, дефинитивно најмал број застапеност на Бошњаците има во фондовите, сите видови на фондови, а исто така многу е алармантна состојбата има и голема нерамноправност на етничките заедници во државните институции, како на пример во Министерството за внатрешни работи, каде што само 0,2% од вработените се изјаснуваат како припадници на бошњачката заедница“, изјави Мерсиха Смаиловиќ, помошник помошник координатор на проектот.
Според резултатите кои се добиени од испитаниците поголемиот дел од нив не се чувствуваат рамноправно на другите заедници во Република Македонија, и се чувствуваат како тие повеќе да и даваат на Република Македонија, отколку држвата на нив.
„Ние сакавме да укажеме на важност на образованието на свој мајчин јазик, како еден од механизмите за подобра интеграција на единките во општеството. Преку анкетата од 1200 испитаници од бошњачката заедница, статистиката е дека 80 проценти од нив се образувале на македонски јазик, додека моменталната состојба е дека 82 отсто од децата на испитаниците исто се образуваат на македонски јазик,“ изјави Селма Ризвановиќ-Мандал, активистка и учесник во проектот.
Целта на проектот е да се информираат граѓаните како да ги остварат своите права, кои институции се надлежни, кои механизми да ги користат, како и препораки до локалната и централната власт што да превземат во однос на подобрување на состојбата на Бошњаците во Република Македонија.
Истражувањето е поддржано од Фондацијата отворено општество-Македонија.
Ангела Петровска
