Бугарија како актуелен претседавач со ЕУ ја поздрави безусловната препорака за почеток на преговорите за членство на Македонија во Унијата.
Бугарското Министерство за надворешни работи соопшти дека тоа е во рамки на напорите на Софија за евроинтеграција на државите од Западен Балкан.
– Особено сме задоволни од препораките на ЕК да почнат преговорите за пристапување на Македонија и на Албанија во ЕУ. Премиерот Бојко Борисов, Владата и дипломатската служба на Бугарија, работеа на тоа во изминатите месеци, се вели во соопштението од бугарското МНР.
Официјална Софија истакнува дека целосно ги поддржува наводите во извештаите на Европската комисија, како и принципите, евроинтеграцијата да се базира на сопствените заслуги, владеењето на правото и доброто економско управување.
– Задоволни сме и од значењето што им се дава на добрососедските односи и од високата оценка за Договорот за пријателство, добрососедство и соработка меѓу Бугарија и Македонија, се наведува во соопштението од бугарското МНР.
Препораките од извештаите на Европската комисија, Бугарија како претседавач ќе ги предложи како заклучоци за усвојување на Советот на ЕУ во јуни годинава.
Извор: МИА
