Еврокомесрот Јоханес Хан, на денешната посета на Скопје, освен билатерална средба со претседателот на Владата, Зоран Заев, се сретна и со владината делегација во чиј состав беа вицепремиерката и министерка за одбрана, Радмила Шекеринска, вицепремиерот за евроинтеграции Бујар Османи и министерот за надворешни работи Никола Димитров. Исто така, Хан присуствуваше на едночасовна тематска седница на Владата, посветена на итните реформски приоритети за евроатлантските интеграции.
„Ја поздравувам Владата за подготвеноста да работи со опозицијата на прашања што се поврзани со интеграцијата на земјата во ЕУ. За ова прашање е потребен национален консезус и повторно ќе нагласам дека местото каде што треба да се води оваа дебата се институциите и Собранието… Многу е значајно да се работи на реформската агенда и да се исполнат итните реформски приоритети и ве уверувам дека од утре ќе почнат да пристигнуваат првите експерти кои ќе ви помогнат, господинот Прибе и неговата група експерти… Реформите не треба да се спроведат само за да се задоволат високи официјални лица од ЕУ и ЕК, туку да се подобрат условите за живот граѓаните“, изјави еворкомесарот Хан на прес-конференцијата, по завршувањето на тематската седница на Владата на Македонија, додавајќи дека е задоволен од градењето меѓусоседски односи на Македонија, посочувајќи го примерот со Бугарија.
„Наша цел е Европската комисија да даде позитивна оценка на Македонија во извештајот за напредокот на земјата наесен, како и да предложи чиста безусловна препорака за почеток на преговорите за членство со ЕУ. За таа цел работиме на подготовка на акциски план наречен ‘Патоказ’што треба да се финализира до 1 јули. Станува збор за предвидени реформи во клучни области, владеење на правото, професионални државни институции, независни регулаторни тела, слободни медиуми што произлегуваат од Договорот од Пржино и забелешките на експертската група на Европската комисија предводена од Рајхард Прибе, Рамковниот договор, извештаите на ЕК за напредокот на Македонија, извештаите на други организации и институции“, истакна премиерот Заев на прес-конференцијата, убеден дека присуството на еврокомесарот Хан на седница на Владата е силен сигнал до сите во земјата дека европските перспективи на Македонија се реалност на дофат, а во текот на наредната година фокусот ќе се насочи кон утврдување датум за почеток на предпристапните преговори за членство во ЕУ.
„Пофалби за премиерот Заев за покажаното лидерство со подадена рака кон соседите и ставањето настрана на политичките и етничките поделби“, беше коментарот на Хан на Твитер, пред почетокот на тематската владина седница.
