По вчерашната прес конференција на која министерот за внатрешни работи, Наќе Чулев, на 9 конкретни прашања поставени од ЦИВИЛ Медиа, даде еден описен одговор, денеска, н пријатно изненадување на редакцијата, одговори на сите три поединечно.
На прашањето дали е точно дека Јавното обвинителство веќе отфрлило како неоснована една пријава од истрагите кои ги најавивте во интервјуто на ТВ 21 на 27 мај? Може ли да ни дадете повеќе детали за тоа, Чулев не знаеше за како истрага се работи.
„Јас не знам за каква истрага се работи и која истрага ја отфрлило обвинителството. Доколку почитуваниот Џабир Дерала ни даде конкретни сознанија, за конкретна истрага може да му дадеме детален одговор“, изјави Чулев.
На прашањето дали е точно дека упорно ги одбива поканите од телевизиите за дуел со заменичката Славјанка Петровска, зошто и дали можеби би прифатиле дебата со заменичката Петровска, организирана од ЦИВИЛ, на која би бил овозможен пристап и на други заинтересирани медиуми, Чулев одговори:
„Работата во МВР е исклучително комплексна и динамична. Изминатиот период имавме исклучително голем обем на работни активности. Јас, генерално, секогаш позитивно одговарам на барањата на медиумите за изјава, за интервју или за став. Во зависност од расположливите можности ќе ја разгледаме поканата за дуел и во наредниот период може да се организира. Дали од ЦИВИЛ или од некоја друга телевизиска куќа“.
На прашањата дали бевте во заблуда или, можеби, лажевте, намерно или ненамерно, кога тврдевте дека ракавиците на снимката од теретаната се отсјај или можеби Мицкоски лаже, кога вели дека се работи за боени ракавици и дали можеби трпите некаков притисок или закани од Мицкоски да го заштитите во случајот „Теретана“, министерот објасни:
„Јас веќе информирав и ќе информирам дека во оној извештај што пристигна до мене од Одделот за внатрешна контрола и криминалистички истраги и полициски стандарди, таму пишуваше дека се работи, цитарам: отсјај по однос на ракавиците. И фактички јас само го цитирав она што беше извештај до мене доставен од Одделот за внатрешна контрола. Во однос на второто прашање, не трпам никаков притисок. Значи, Одделот за внатрена контрола постапува во координација со ОЈО и во соработка со двајцата помошници министри и дополнителниот и помошникот министер и во моментот се изврешни разговори со лицата коишто работеле во теретаната „Синерџи“, меѓутоа и во моментот се врши вештачење од Одделот за компјутерски криминал и дигитална форензика на оној едногодишен период од материјалите што се земени од страна на фитнес клубот „Синерџи“. Кога ќе се утврди, се надевам, тоа ќе биде во краток период, во соработка со Јавното обвинителство ќе биде дадена конкретна информација за вистинитата, објективната и точна состојба каква била во врска со овој случај“.
Редакцијата се надева дека и покрај комплексноста и динамичноста на работата на МВР и министерот, ќе се најде време и простор за дебата со дополнителната министерка за внатрешни работи Славјанка Петровска, во организација на ЦИВИЛ. Секако, во интерес на јавноста, како што изрази надеж и министерот, случајот „Теретана“ ќе има своја објективна и вистинита разрешница.
Б. Јордановска
Монтажа: Ариан Мехмети
