Сегашниот в.д. претседател на Сојузот на синдикати на Македонија (ССМ) Дарко Димовски е единствениот кандидат за претседател на ССМ на претстојниот Вонреден конгрес што ќе се одржи на 11 ноември.
Одлуката е донесена на денешната седница на Советот на ССМ со 35 гласа „за“, осум „против“
и три воздржани.
„Утврдениот предлог за претседател на ССМ во предходно спроведена постапка согласно Критериумите, беше поддржан од 12 грански синдикати здружени во ССМ, односно од 2/3 од синдикатите здружени во ССМ во кои членуваат 43.288 членови и истиот ги исполнува во целост потребните услови согласно критериумите“, се наведува во соопштението од ССМ.
За синдикален лидер, кандидатури поднесоа сегашниот в.д. претседател Дарко Димовски, претседателот на УПОЗ, Пецо Грујовски и претседателот на Македонскиот полициски синдикат Ацо Антовски, но Претседателството на ССМ утврди дека само Димовски ги исполнува условите за кандидатура.
Претседателот на УПОЗ, Грујовски, кој тврди дека ги исполнува условите за кандидатура, вели
дека во консултација со синдикатите кои го поддржуваат ќе одлучат за следните чекори што ќе
ги преземат.
„Ова е врв на малверзациите и со ова губи само синдикалното движење“, изјави Грујовски.
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
