ЏАБИР ДЕРАЛА
Путин, рускиот неприкосновен автократ, архитект и нарачател на бруталната агресија врз Украина, каде што руската војска и паравоените формации помогнати од Кремљ спроведуваат невидени воени злосторства и геноцид, одржа говор на воената парада во Москва, по повод 9 Мај. За Путин, бруталната агресија врз Украина е „превентивен напад“. Тој ја правда својата воена авантура со потребата да се „заштити Русија од агресијата на Украина и Западот против Русија“. Според него, тоа била „неизбежна“ и „единствената исправна одлука“.
Наспроти очекувањата дека ќе објави интензивирање на воените дејствија, тој прогласи победа (со најмалку 20.000 загинати војници, меѓу кои и 400 офицери и 12 генерали, стотици тенкови, потоната „Москва“ и други бродови…). Со бескрајна дрскост изрече бескрајни небулозни напади врз западните демократии и Украина. Соочен со пораз на боиштата и едногласна осуда од целиот демократски свет, тој и немаше избор, освен уште еднаш да го покаже вистинското лице на неговото крваво владеење кое ќе го заврши како воен злосторник.
Русија и Путин нема што да прославуваат на 9 Мај, најмалку како датум поврзан со победата. Можат единствено да се сетат дека 77 години по нивната победа во Втората светска војна, тие се на другата страна, на страната која уништува цели градови и села, спроведува воени злосторства и геноцид, војува против мирот, демократијата, слободата и човечноста. Датумот кога Русија треба да се сеќава на 20-те милиони жртви што ги дадоа сите народи во состав на Советскиот Сојуз во Втората светска војна. Меѓу нив беа и Русите и Украинците и уште петнаесетина други народи. Денес, 9 Мај е ден на срамот и поразот на Русија и руската нација.
Руската воена агресија врз Украина, започната во 2014 година, му донесе пораз на Путин. Веќе во првите часови по почетокот на целосната инвазија на 24 февруари 2022, стана јасно дека цел на Путиновата агресија не се само воени цели, туку и цивилите и цивилните објекти, почнувајќи од градинките и болниците, завршувајќи со инфраструктурата неопходна за нормален живот.
„Вие се борите за татковината, за нејзината иднина, за никој да не ги заборави лекциите од Втората светска војна. За да нема место во светот за џелати и нацисти“ – рече Путин на воената парада.
Несфатлив е цинизмот на говорот на Путин. Неговиот 11-минутен говор и едната минута молк ќе останат забележани како уште еден пример за лицемерието и манипулацијата. Путин упорно инсистира на реалноста што постои само во неговата глава. Путин е спремен да ја брани таа „реалност“, не со силата на аргументите, туку со офанзивна пропаганда и со јазикот на оружјето, со безмилосна деструкција и истребување на цивилното население.
Војската на Путин ограбува, урива, пали, измачува, силува и убива жени, деца и невооружени цивили. Нема победа во тоа. Само срам и пораз.
Нема што повеќе да се каже за говорот на човекот што ја зграпчи власта во Русија пред 23 години, ги апси и убива своите неистомисленици и ја заокружува својата кариера како воен злосторник.
