ЏАБИР ДЕРАЛА
Од денешните вести од регионот се издвојува изјавата на српскиот претседател Вучиќ кој ги потврди најавите стари повеќе од една недела, дека Европрајд (паневропска манифестација за правата на ЛГБТИ заедниците) ќе биде „откажан или одложен“. Во повеќето извештаи за оваа одлука на српскиот претседател, објавени на македонски јазик, доминира неговиот изговор со тешката ситуација на релација Белград – Приштина.
„Ќе биде одложена или откажана, како сакате, Парадата на гордоста, што беше закажана за месец септември. Или како веќе се нарекува тоа чудо, не е ни важно“ – изјави Вучиќ и додаде дека премиерката Брнабиќ и членовите на Владата „ќе образложат сѐ во согласност со законот“ – изјави Вучиќ.
Понатаму во истиот дел од изјавата, изговорот на Вучиќ за откажување на Европрајд беше дека манифестацијата не може да се одржи во политичката ситуација во која се наоѓа Србија.
„Не го велам тоа затоа што сум многу среќен, туку дека не можеме во овој момент, кога имаме и Отворен Балкан и криза на Косово, немаме никакво придвижување, право да ви кажам, немаме каде да се помрднеме, нема да се откажеме од неутрални таблички“ – рече Вучиќ.
Потоа додаде и дека Србија се соочува со „сите можни проблеми“ и дека мора да се „бавиме со енергетика и храна, проблеми со сушата, со сите можни полициски проблеми во сите кризи кои денес ги имаме“, така што му се чини дека нема потреба никому посебно да му објаснува.
Можеби ве интересира, а не сте имале каде да прочитате, како на оваа одлука на Вучиќ одговорија организаторите на Европрајд. Еве…
Марко Михајловиќ, директор на Белград Прајд и еден од организаторите, на Твитер напиша:
„Државата не може да го откаже EuroPride – може само да проба да го забрани, што би било јасно кршење на Уставот, како и пресудата на уставниот суд кој забраната на Прајдот во 2011, 2012, 2013 година ја прогласи за неуставна. Прајдот се одржува според планот, на 17.09. во 17 часот пред Народното Собрание!“
И европската организација Европски Прајд (European Pride) реагираше со истиот тон.
„ЕуроПрајд не може да биде откажан, а било која ‘забрана’ е незаконска“ – се вели во насловот на реакцијата.
Претседателката на Европската асоцијација на организатори на Парадата на Гордоста – која го лиценцира EuroPride – Кристин Гарина изјави:
„Ниту домаќините на EuroPride 2022, Belgrade Pride, ниту ние како давател на лиценцата нема да го откажеме EuroPride во Белград.“
Понатаму, Гарина истакна дека секој обид да се забрани Прајдот е спротивно на Европската конвенција за човекови права.
„Правото на Прајд е прогласено од страна на Европскиот суд за човекови права како основно човеково право. Секој обид да се „забрани“ Прајд е прекршување на членовите 11, 13 и 14 од Европската конвенција за човекови права, ратификувана од Србија како членка на Советот на Европа“ – рече Гарина.
Да биде иронијата уште поголема, всушност, Вучиќ денеска објави дека Брнабиќ ќе биде старо-новата премиерка на Србија. На тоа првиот човек на Белград Прајд, Марковиќ, на Твитер реагираше со зборовите:
„Најавата на забрана на ЕуроПрајд на истиот ден кога лезбејка добива нов мандат за водење на владата е срамота!“
ЕуроПрајд во Белград има богата програма и се предвидува да трае од 12 до 18 август.
Ете, сега можеби знаеме повеќе за оваа тема. Нека е и Вучиќ, ама и тој не знае сѐ или барем не кажува сѐ, зарем не?
