„Ние ќе ги покриваме изборите на три различни начини. Еден тим ќе биде долгорочен, тим за набљудување и тој ќе биде активен. Вториот ќе биде класичен, кадешто имаме набљудувачи повеќе од минатиот пат, односно 80 набљудувачи вклучително и една странска државјанка од една западна држава, и третиот начин е што граѓанките и граѓаните имаат огромна доверба во ЦИВИЛ, и имаме тим кој се занимава со повици од граѓаните без разлика дали ние имаме покриеност, но тие информации секако се проверуваат“, рече претседателот на ЦИВИЛ Џабир Дерала во гостувањето во ТВ Клан Македонија.
„Нашата методологија е таква, што и 80 набљудувачи можат да покриват голем простор, големи избирачки места во најмалку 460 избирачки места, меѓутоа постои можност да се покријат и до 750 избирачки места зависно од теренот и рутите кој што ќе ги определи координативниот дел на ЦИВИЛ“, нагласи Дерала.
Тој истакна дека донаторите овој пат се решија повеќе средства да им доделат на меѓународните мисиии отколку на домашните, што влијаше на помалиот број на наблудувачи на ЦИВИЛ.
„ЦИВИЛ како организација беше дел од работната група за изборни измени. Тоа беше една долга комплексна задача која ја спроведуваат многу ентитети – и институции и невладини организации. Беше предводена од правниот експерт и поранешниот претседател на ДИК, Новаковски и тоа беше шест-седум месечна активност на сите што учествувавме во работната група“, кажа претседателот Дерала.
Тој понатаму рече дека партиите во последен момент, во март изгласаа изборни измени.
„Ние имавме огромен документ со многу добри решенија кои беа целосно согласно препораките на ОДИХР и со препораките на ЦИВИЛ, МОСТ, ИНКЛУЗИВА и други низ годините, а само две или три препораки беа имплементирани. Една од тие препораки кои не се имплементираа се однесува на државното финансирање на политичките кампањи. Се работи за државно финансирање на политичките кампањи во медиумите кое вакво какво што е è отворена легализирана корупција на медиумите“, истакна Дерала.
Дерала нагласи дека вака како што е сега секоја партија може со вашите пари да појде во ДИК и да каже – јас ги сакам овие и овие медиуми дајте им ги нив парите, бидејќи тие се мои медиуми. И затоа имате поларизирани медиуми – имате пари кои се слеваат во одредени медиуми кои после тоа „нормално“ ќе навиваат за вас, рече Дерала
„Предлогот на ЦИВИЛ беше да се исфрли државното финансирање, партиите да си прават кампања со свои пари, со спонзори, членарини и други начини.
Не стои образложението дека ова е добро зошто државата има контрола врз парите за финансирање. Вие ако сакате да ги контролирате парите имате Финансиска полиција, УЈП, Државен завод за ревизија,, Антикорупциска комисија и други институции кои можат тоа да го следат и да го санкционираат ако има грешки“, потенцира Дерала.
Н. А.
