Интернет страницата News1.mk објави текст со наслов „(ФОТО) Навивачи на Шверцери – Шкупи протестира на другата страна на Вардар “. Текстот се појави за време на насилните протести против решението на ЕУ за македонско-бугарскиот спор, што се одржаа пред трите македонски институции, Собранието, Владата и МНР, вечерта на 5 јули.
Оваа фото „вест“ се состои од една матна фотографија направена оддалеку и од која не го објаснува, ниту го илустрира тврдењето во насловот. Текстот гласи:
„Поголема група граѓани навивачи на „Шверцери – Шкупи“ кои со себе носат иконографија на УЧК и извикуваат националистички пароли, протестира на другата страна од Вардар, под Калето, кај мостот Гоце Делчев. Полициски сили ја држат групата на тој дел од градот.“
Текстот завршува со зборовите „Наскоро повеќе…“ и не е потпишан.
Ова е дезинформација.
За што се работи?
Вистината е дека се работи за навивачка група на фудбалскиот клуб „Шкупи“ која се собра за поддршка на нивниот спортски клуб. Навивачите се собраа во пресрет на фудбалски натпревар што е дел од „Лигата на шампионите“ во кој играше скопскиот фудбалски тим Шкупи. Не да протестираат. Ништо не може да биде поврзано со протестите, освен што фудбалскиот натпревар се одржа во исто време со протестите.
Дополнително, интернет страницата News1.mk во наведениот текст ги поттикнува етничките предрасуди и стереотипи, без чувство за одговорност за штетата која може да ја предизвика во момент кога општеството се соочува со деликатни процеси и безбедносни предизвици поради ескалацијата на протестите. Изразот „од другата страна на Вардар“ што се користи во насловот и во текстот се користи за да се означи етничката припадност на Албанците, иако и на двете страни на реката Вардар која тече низ главниот град живеат најмалку шест различни етнички заедници.
Останува нејасен мотивот за пласирање на оваа дезинформација.
За време на насилните протести што ги организираа радикални антизападни политички партии и здруженија беа повредени 47 полицајци од кои 13 со потешки повреди, вклучувајќи и двајца во сериозно тешка состојба. Интернет медиумите и социјалните мрежи беа преполни со говор на омраза и повици на насилство врз основа на етничка припадност и политичка ориентација.
ЦИВИЛ Мониторинг тим