Државната изборна комисија денеска на 139. седница ги утврди изгледот и содржината на гласачкото ливче за претстојните локални избори.
Како што појасни претседателот на ДИК, Борис Кондарко гласачкото ливче за градоначалник содржи назив на гласачкото ливче, број на гласачко место и општина, име и симбол, доколку го има од подносителот на листата, реден број, име и презиме на кандидатите врз основа на податоците од матичната евиденција.
Кондарко додаде дека делот од гласачкото ливче, кој останува на кочанот, на блокот содржи сериски број на гласачкото ливче, општината и бројот на гласачкото место.
-Серискиот број не стои на самото гласачко ливче, тој останува на блокот, на кочанот, така што да нема забуни ниту едно гласачко ливче не може од никого да биде идентификувано според сериски број, додаде Кондарко и појасни дека на крајот на гласачкото ливче за избор на градоначалник се содржи и името на општината, односно Градот Скопје за кој се врши изборот.
Гласачкото ливче за членови на советите содржи назив на гласачко ливче, број на место и назив на општина, реден број и симбол доколку го има на подносителот на листата, име и презиме на носителот на листата, врз основа на податоците од матичната евиденција. Исто така делот од гласачкото ливче кој останува на кочанот на блокот ги содржи серискиот број на гласачкото ливче, општината и бројот на гласачкото место. Во називот на гласачкото ливче за избор на членови на Совет се содржи и името на општината, односно Градот Скопје за кој се врши изборот.
Членовите на ДИК денеска го усвоија и Предлог прирачникот за пополнување записниците за образецот број 16. Кондарко појасни дека станува збор за засписниците од избирачките одбори, а прирачникот служи за појаснување, прецизирање и поедноставување на работата на избирачките одбори во гласачкото место при утврдување на резултатите од гласањето.
Членот на ДИК, Дитмире Шеху истакна дека самиот записник број 16 претставува основен и најважен документ за евидентирање, сумирање и утврдување на резултатите од гласањето на секое гласачко место.
-Овој записник го пополнуваат избирачките одбори по завршувањето на гласањето и броењето на гласовите. Тука на детален начин се наброени сите делови од записникот како се пополнува, правата на избирачките одбори, правата на овластените претставници на самото избирачко место и сметаме дека ќе им биде од корист на избирачките одбори, рече Шеху и додаде дека истиот ДИК ќе го достави до Општинските изборни комисии.
На седницата беа усвоени и неколку предлог обрасци, Образец под број 13 Б, засписник за предавање на гласачки ливчиња и друг доверлив материјал за гласање на територија на Град Скопје од ДИК на ОИК, Образец број 13 Г, засписник за предавање на гласачки ливчиња и друг доверлив материјал за гласање за градоначалник и Совет за 2025, Образец број 13 Д, засписник за предавање на записници за утврдување на резултати за гласањето на територија на Град Скопје од ДИК на Изборна комисија на Град Скопје за 2025 година, Образецот број 15, засписник за утврдена состојба на просторијата за гласање, изборниот материјал во просторијата за гласање, гласачките кутии и функционалноста на уредите за биометриска идетификација од страна на избирачкиот одбор и Образецот според членот 107 став 3 од Изборниот законик во случај за постоење неможност за остварување на избирачкото право, односно за евиденцијата на ваквите евентуални случаи.
ДИК ја усвои и одлуката за дополнување на одлуката за формирање на работни групи. Кондарко појасни дека оваа одлука е поврзана со внатрешната организација и екипираност на вработените од Секторот за Избирачкиот список, кои ќе работат на проверка на податоците на отпечатените изводи од Избирачкиот список.
Членовите на ДИК одобрија и две барања за акредитации за набљудување на изборите.
Како што појасни членката на Комисијата Светлана Карапетрова, едното барање е доставено од Здружение за општествен развој – Тетово, кое бара пет набљудувачи, а другото од Француската Амбасада во земјава, која бара девет набљудувачи.
ДИК одлучуваше и по седум барања за изземање на претседатели, заменици, членови и нивни заменици на ОИК и Изборната комисија на Град Скопје, при што шест од нив беа прифатени и беше утврдено дека има објективни причини за тоа, а едно беше отфрлено. На местото на оние чии барања беа прифатени, по случаен избор беа избрани нови лица, пренесе МИА.
