„СДСМ ги организираше најнедемократските избори во историјата на независна Македонија. Целата изборна кампања помина во светло на изборен поткуп, уцена и закани врз гласачите, додека во текот на изборниот ден беше спроведен т.н. бугарски воз, со што кутиите беа полнети со гласачки ливчиња однапред заокружени за СДСМ“, се вели во соопштението на ВМРО-ДПМНЕ.
ВМРО-ДПМНЕ најавува дека ќе го искористи правото на жалба пред Уставниот суд, откако сите 40 приговори за изборни нерегуларности беа одбиени од Државната изборна комисија.
Од партијата соопштуваат дека и покрај бројните докази со кои располагаат, вклучувајќи ги и оние што се објавени во медиумите, ДИК ги одби сите нивни приговори и на тој начин стана соучесник во „прикривање на изборните криминали на СДСМ“.
„Медиумите веќе објавија докази за бугарски воз и како тој бил спроведен, беа објавени докази за спроведен бугарски воз во Карпош, Охрид, Велес, Струмица, Гевгелија, Берово и Делчево, а пронајдени се две гласачки ливчиња со ист сериски број во Ресен“, стои во соопштението.
„ВМРО-ДПМНЕ нема да дозволи некој да ја уништува демократијата и правната држава во Република Македонија. ВМРО-ДПМНЕ ги повикува ОБСЕ и ОДИХР да ги нотираат овие очевидни криминали, да застанат на страна на демократијата, правото на глас и слободата како врвни вредности на цивилизираниот свет, да ги осудат и санкционираат ваквите криминали“, соопштуваат од опозицијата.
Исто така, ВМРО-ДПМНЕ во своето соопштение до јавноста и предупредуваат дека, со враќањето на демократијата и правната држава, сите прекршители на законот ќе одговараат за штета нанесена врз граѓаните и сите ќе бидат казнети што учествувале во изборниот криминал.
Од СДСМ, уште вчера побараа ВМРО-ДПМНЕ да се помири со фактот дека изгубија и да го признаат изборниот пораз.
„Очигледно е дека ВМРО-ДПМНЕ не може да функционира во регуларни услови и продолжува да бара оправдувања за убедливиот пораз. Резултатите јасно покажаа каква е вистинската избирачка волја кога граѓаните гласаат слободно и без притисоци“ се вели во соопштението на СДСМ.
ЦИВИЛ – Центар за слобода ги оцени изборите како слободни, но укажа на фактот дека постоеја голем број нерегуларности. Како што најавуваат во организацијата која ужива исклучително висока доверба на национално и меѓународно ниво, идната недела ќе презентираат низа нови аспекти и случаи кои се однесуваат на спроведувањето на изборниот процес.
Биљана Јордановска
