„Не ми требаат стотина статуи за да бидат горд Македонец, ниту ми пречи кога грчки граѓанин во Солун, се нарекува Македонец! Мислам дека е 21 век и не треба да покажуваме многу комплекси, со обид за зацврстување на овие чувства“, рече македонскиот шеф на дипломатијата Никола Димитров, по денешната средба со својот колега, Никос Коѕијас, во Скопје.
Ваквиот став Димитров го изнесе, одговарајќи на новинарско прашање од грчката национална информативна агенција: „Во врска со иредентизмот што го спомена господин Коѕијас, околу симболите што ги гледаме на Александар Велики, на Македонците, општо во Скопје. Бидејќи и вие како Влада, карактеризиравте дека се предизвикуваат некои други чувства кон соседите, имате цел нешто да решите околу овие симболи, има некоја одлука да се сменат имињата на аеродромите, патиштата, да се тргнат некои од овие симболи?“
„Ние, не само како Влада, туку воопшто како општество, единствена голема работа што ја гледаме, и кон што се стремиме е Голема Европа. Мислам дека не е многу мудро да се креира некоја надворешна или внатрешна политика, врз историски личности од пред 2000 години. Ние сме една нација, којашто научи некои лекции во последниве неколку години, свесни сме дека историјата не можеме да ја менуваме… Тоа што можеме да го направиме е да ја менуваме сегашноста и да си ја отвориме иднината. Го цитирам често Никос, ‘историјата треба да е учител, но не треба да биде затвор’… Како политика, ние цврсто ќе стоиме, на нашите обврски од Времената спогодба од 1995, и секаде каде што можеме, ќе реагираме. Бидејќи многу е погрешен сигнал, како што ние не сме среќни, кога нечии големи мапи навлегуваат во територијата на Република Македонија, така разбираме дека и Грција не е среќна, кога ние, или некој, мафта со големи мапи. Мислам дека е 2017, двата народа многу посреќно ќе живеат, ако има мостови и отворени врати“, порача Димитров.
Како што рече, оваа е втора средба со Коѕијас, и не може да се очекува дека работите ќе се движат многу брзо.
„Правата средба беше запознавачка, денеска имавме подолги разговори, ова се чекори… Мислам дека не е разумно да најавам каква ќе биде нашата политика. Меѓутоа, во секој случај, ќе се движи во овие рамки. Меѓународните обврски, се стремиме кон Голема Европа, не сакаме други! И мислам дека тоа е единствената формула за среќен и успешен Балкан. И ќе се обидуваме ова наше убедување, да го шириме и во другите држави“, рече Димитров.
Моника Талеска
Камера: Атанас Петровски
Монтажа: Даниела Нисева