По претставката доставена од Коалицијата „Сексуални и здравствени права на маргинализираните заедници – СЗПМЗ“, Комисијата за заштита од дискриминација одлучи спротивно на ставот на Народниот правобранител. Во учебникот „Социјална патологија“ од авторите Зоран Сулејманов и Нелко Стојановски, во делот каде се дефинира хомосексуалноста стои: „Ако како девијантно го определивме она однесување кое во значителна мерка отстапува од општествените норми и вредности, на кои реагира општествената заедница, а кое се менува во времето и просторот, тогаш хомосексуалното однесување може да се третира како посебен вид девијантно однесување. Но, бидејќи ја спомнавме и општествената реакција, тогаш сметаме дека ставот кон оваа појава денеска во голема мера е ублажен, односно, зголемена е толерантноста. Но, сепак, во цивилизираните средини на современиот свет, воопштено кажано, хомосексуалноста се оценува негативно, како абнормална, девијантна појава во човечкото однесување“. (стр. 350) Како и: „Со медицинска терминологија би можеле да го означиме како хомосексуален синдром“. (стр. 355).
Во оваа дефиниција – Комисијата за заштита од дискриминација не препозна дискриминација.
По истата претставка, Народниот правобранител утврди дискриминација, а Ректоратот на УКИМ предвиде измени на Правиликот за организирање на издавачката дејност, со внесување на анти-дискриминаторска клаузула.
Според Народниот правобранител, „спорните текстови не се во склад и не соодветствуваат на сегашната домашна и меѓународна регулатива, односно, истите се застарени, полни со предрасуди и стереотипи кои се неприфатливи за едно модерно и демократско општество“.
Но, Комисијата за заштита од дискриминација смета дека во спорните делови од учебникот „не се содржани зборови кои упатуваат на навреди или на поттикнување на омраза“. Комисијата своето мислење го оправдува и со тоа дека „слободата на научното и на уметничкото творештво е загарантирано право со Уставот на Република Македонија“.
Тука, Комисијата не го зема во предвид фактот дека „слободата на изрзување, вклучително и слободата на научното творештво е ограничена со говорот на омраза и заштитата од дискриминација на граѓаните“, велат од Коалицијата СЗПМЗ.
„Со ваквото постапување, Комисијата ги легитимира дискриминаторските практики, наместо истите да ги санкционира. Уште еднаш станува јасна потребата од итни законски измени на Законот за заштита и спречување од дискриминација, со цел професионализација и јакнење на капацитетите на Комисијата и нејзино одговорно и стручно работење“, сметаат од Коалицијата СЗПМЗ.
Оттаму бараат од Собранието да не дозволи овој важен орган за заштита на правата на граѓаните да остане узурпиран од ВМРО-ДПМНЕ и во најскор можен рок да почне постапка за промена на составот на Комисијата за заштита од дискриминација.
Марија Теговска
