На денешната седница Државната комисија за спречување корупција и судир на интереси го разгледуваше случајот за судир на интереси на министерката за финансии Нина Ангеловска, а поврзано со случајот стечај на Еуростандард банка.
„Прв документ кој укажува на проблемот со Еуростандард банка е од 4 јуни 2020 на Комитетот за финансиска стабилност, што е и единствениот писмен доказ со кој располагаме од кога почнале разговорите за проблемот со банката. Министерката за финансии по службена должност треба да располага со податоци и информации со движењата во банкарскиот систем и финасиските пазари, меѓутоа законот и меморандумот не упатуваат на обврски гувернерот на Народна банка за редовно писмено или усмено известување на министерот. Тоа значи дека дали и колку тие меѓусебно се информирале ние точно не можеме да утврдиме бидејќи нема записници. Во функција на одбегнување на судир меѓу приватниот и јавниот интерес вреди да се каже дека Владата на Република Северна Македонија по препорака на ГРЕКО има донесено етички кодекс и за носителите на јавни функции што се определени од Владата, во кој јасно стои дека треба да го почитуваат Законот против корупција за да избегнат судир на интереси, меѓутоа и сомнеж за судир на интереси“, изјави претседателката на ДКСК, Билјана Ивановска на прес-конференција по завршување на седницата.
„Министерката имала можност да ги дознае информациите поврзани со банката каде што таа е клиент, а кои што не биле достапни до другите клиенти, штедачи на банката, така што овие податоци и инфромации можеле да имаат влијание врз донесувањето на нејзините одлуки поврзани со депозитот што го имала со што била во позиција да оствари предност пред останатите штедачи во банката“, изјави Ивановска.
ДКСК доаѓа до заклучок дека нема кривична одговорност кај министерката Ангеловска, но од етички аспект го покренува прашањето на високо ниво и за таа цел ќе препорачаат да се доуредат прописите, особено Меморандумот за соработка меѓу Народна банка и Министерството за финансии, како и останатите регулаторни тела со додавање уредби. Овие уредби треба да го регулираат особено оној дел каде се вели дека одреден носител на функција има можност да располага со информации и тие да ги искористи за своја корист или да обезбеди предност за себе или некој друг.
Б. Ј.
