„Идејата е да се мобилизираат жените, вклучувајќи ги и транс-жените, и сите оние што ги поддржуваат, во меѓународен ден на борба – марширајќи, блокирајќи патишта, мостови и плоштади, воздржувајќи се од домашната работа, од грижата и од сексот, бојкотирајќи ги… Овие активности се насочени – да се направат видливи потребите и аспирациите на сите оние што се игнорирани: жените на формалниот пазар на труд, жените што работат во сферата на општествената репродукција и грижа, и невработените жени, како и оние со несигурна работа“, вели феминстката Ангела Дејвис, која во колумна во Гардијан, , под наслов „Ден без жени“, повикува на генерален штрајк на 8 Март – Меѓународниот ден на жената.
Дејвис заедно со преостанатите членки од групата што го организираше Женскиот марш во Вашингтон по инаугурацијата на американскиот претседател Доналд Трамп, повикуваат за феминистичко движење и за масовен штрајк, што нема да е насочен само против претседателот Трамп конкретно, туку ќе се протестира и во името на долгогодишната борба на жените против насилството на мажите и за постигнување на репродуктивното право и правата на работничките. Феминистички групи од повеќе од 30 земји, исто така, помагаат да се организира штрајкот.
Поддржувачите на оваа идеја, преку Твитер профилот „Марш на жените“, информираат дека за подетални насоки како ќе се организира и како ќе изгледа штрајкот, ќе известуваат дополнително.
Ако се има во предвид дека Маршот за женски права кој започна во САД, како реакција на ставовите на Трамп во однос на жените поддршка доби и од жителите на Синднеј, Лондон, Париз, Прага, Берлин, Женева, Амстердам, Белград, Приштина, а протести имаше и во Јужна Африка…, или, вкупно, во 37 држави, каде се одржаа 600 протести, се очекува масовна поддршка и за најавениот штрајк „Ден без жени“.
