Уште едно чудо се случи во Туркије, откако дванаесетгодишно дете беше спасено од урнатините на зграда во Антакија, во провинцијата Хатај, 260 часа по разорните земјотреси што во понеделникот минатата недела ги погодија јужните делови на Туркије, јавува Анадолија.
Екипите за пребарување и спасување од под урнатините на зграда во населбата Екинци го извлекоа детето Осман Халебија, странски државјанин.
Тој беше извлечен жив од урнатините 260 часа или речиси 11 дена по разорните земјотреси.
По спасувачката акција детето со возило на Итна помош било пренесено во болница.
Анадолија претходно објави дека во провинцијата Караманмараш била извлечена жена (42), која преживеала 257 часа под урнатините.
Според последните податоци, во разорниот земјотрес во Туркије загинале 38.044 луѓе.
Фото: миа.мк
