Европската Унија се движи кон воведување забрана за влез за руски државјани кои учествувале во војната против Украина – чекор што Кијив го оценува како праведен, навремен и неопходен сигнал во услови на продолжена агресија.
Украинската амбасадорка Лариса Дир, во своја објава, ја истакна тежината на војната и одговорноста на сторителите:
„Ден 1518. Русите, кои секојдневно убиваат Украинци, треба да патуваат само до Специјалниот трибунал.“
Ден 1518. русите, кои секојдневно убиваат Украинци, треба да патуваат само до Специјалниот трибунал. pic.twitter.com/YV09N7NIkD
— Larysa Dir (@dir_larysa) April 22, 2026
Оваа порака доаѓа во контекст на најавите од шефицата на европската дипломатија Каја Калас дека ЕУ разгледува конкретни мерки за ограничување на влезот на поранешни руски борци, како дел од поширокиот пакет санкции и безбедносни политики.
„Додека Русија бомбардира музеи, уништува цркви и се обидува да ја избрише украинската култура, не треба да ѝ биде дозволено да ја изложува сопствената. Враќањето на Русија на Биеналето во Венеција е морално погрешно, а ЕУ исто така има намера да го прекине неговото финансирање. Конечно, до јунскиот состанок на Европскиот совет ќе излеземе со предлози за ограничување на влезот на поранешни руски комбатанти во Европската Унија“, изјави Калас на вчерашната прес конференција.
Министерот за надворешни работи на Украина, Андриј Сибига, силно ја поддржа оваа иницијатива, нагласувајќи дека станува збор за порака со долгорочни последици:
„Го поздравувам јасниот сигнал на мојата колешка, шефицата на европската дипломатија Каја Калас, за подготвеноста на Европската Унија да воведе забрана за влез за руските комбатанти. Ова е навремен и важен чекор, кој ќе му покаже на секој русин: потпишувајќи договор за учество во злосторничката војна на агресија против Украина, тој исто така си потпишува забрана за влез во Европа. Ова е праведно. Ако водиш војна за да ѝ наштетиш на Европа и на европските држави – немаш право таму да патуваш. Ги повикувам сите држави-членки на ЕУ да го поддржат овој критично важен чекор.“
Слични ставови се појавуваат и во меѓународните извештаи, каде Сибига оценува дека ваквата мерка е „фер“, бидејќи оние што се борат против европските вредности не треба слободно да патуваат низ Европа.
Предлогот не е само политичка порака, туку и безбедносна мерка. Европските лидери предупредуваат дека поранешни борци би можеле да претставуваат ризик за безбедноста, со можни врски со криминал или екстремистички мрежи.
Во таа насока, идејата за забрана на влез се вклопува во поширокиот тренд на заострување на визниот режим за руски државјани, што ЕУ го применува од почетокот на руската агресија врз Украина.
Изјавите на украинските претставници и дипломатските сигнали од Брисел носат јасна порака: учеството во агресивна војна не е само воен чин – тоа има долгорочни политички, правни и лични последици.
Во контекст на иницијативите за формирање Специјален трибунал за руската агресија, ваквите мерки дополнително ја зајакнуваат идејата за одговорност – не само на државно, туку и на индивидуално ниво.
Џ. Д.
