Европските воени сили почнаа да пристигнуваат во Гренланд, територија под суверенитет на Данска, откако преговорите во Вашингтон меѓу американскиот потпретседател Џеј Ди Ванс, државниот секретар Марко Рубио и министрите за надворешни работи на Данска и Гренланд не успеаја да ги решат разликите околу иднината на минерално богатата арктичка територија, пишува Еуроњуз.
Данскиот министер за надворешни работи, Ларс Локе Расмусен, рече дека позицијата на САД не била променета и дека постои „фундаментално несогласување“. Тој истакна дека преземање на Гренланд од страна на САД „апсолутно не е потребно“ и дека „се согласуваат да не се согласуваат“.
Според Еуроњуз, во рамките на распоредувањето, Франција, Шведска, Германија и Норвешка најавија дека ќе испратат воен персонал за извидувачки активности во Нуук, како дел од координирана мисија на НАТО и европските сојузници. Германското министерство за одбрана соопшти дека тим од 13 припадници на Бундесверот ќе биде во Гренланд од четврток до недела на покана на Данска. Францускиот претседател Емануел Макрон изјави дека првите француски војници веќе се на пат, а други ќе следат.
Заменик-премиерката на Гренланд, Мут Егеде, истакна дека НАТО ќе ги зголеми своите активности во регионот, вклучувајќи повеќе воени летови и бродови, како и заеднички тренинзи.
Од американска страна, Трамп повторно ја нагласи важноста на Гренланд за националната безбедност на САД и не исклучи ниту една опција за иднината на островот, иако признава интереси на Данска. Тој рече дека има „многу добра врска со Данска“ и дека „некој договор ќе се најде“, додека истакна дека ако САД не дејствуваат, **Русија или Кина би можеле да се обидат да ја заземат територијата“.
На улиците на Нуук, оваа недела се виореа црвено-бели гренландски знамиња во излозите на продавниците, на балконите, автомобили и автобуси, во знак на национално единство. Жителите на Нуук, изразија загриженост бидејќи се наоѓаат во центарот на геополитичкиот фокус, но се надеваат дека ќе можат да продолжат да живеат „во мир и без да бидат вознемирувани“.
Овој развој го нагласува растечкиот геополитички интерес за Арктикот, со стратешка и економска важност на Гренланд, што доведе до засилено европско воено присуство и зголемена улога на НАТО сили во регионот.
Д. Т.
