„Се соочуваме со силен бран на Ковид-19, ситуација која ги оптоварува сите сегменти на здравствениот систем. Во модуларната болница до Инфективната клиника има слободни кревети. Направивме план за обезбедување дополнителни болнички капацитети, прво болницта во Козле, каде има 40 кревети, каде има кадар засилен со колеги од Инфективната клиника. Уште две одделенија се подготвуваат во ГОБ „8 Септември“ со кадарот кој работи таму, а до крајот на денот треба тој план да го заокружиме за да биде подготвен и тој дел. Исполнети се болничките инфективни одделенија во другите градови“, истакна министерот за здравство Венко Филипче на денешната прес-конференција, заедно со претседателот на Комисијата за заразни болести, Жарко Караџовски.
Филипче додаде дека на денешната седница на Владата е ставена информација со која ќе се овласти Министерството за здравство да го потпише и посебниот договор преку заедничкиот рамковен договор со ЕУ за набавка на лекот „Ремдесивир“ и освен преку СЗО тој од следниот период ќе биде достапен и преку оваа набавка. За многу кратко време, посочи Филипче, очекуваме по потпишување на договорот да стигне во земјава.
„Се обезбедија дополнителни капацитети и број на тестови во повеќе институции. Граѓаните мора да покажат поголема свесност и да ги почитуваат мерките. Изутрината имавме состанок со Комисијата за заразни болести, а после тоа и со Штабот. Во среда закажавме состанок со сите 56 прватни интернисти во државата, кои имаат договор со Фондот, од кои половината се во Скопје, за да може да се вклучат во системот на дежурства во сите болници каде се лекуваат заболените од Ковид-19“, додаде Филипче.
Министерот изјави дека огромен процент од пациентите со Ковид-19 се со коморбидитети, односно со тешка форма на некоја друга хронична болест од која биле лекувани навистина долго време и посочи и дека сериозен процент на пациентите доаѓаат доцна во болницата со веќе многу тешка манифестација на болеста.
„Се заврши анализата, дел од податоците беа соопштени и од Инфективната клиника, огромен процент од пациентите се со коморбидитети, значи тешка форма на некоја друга хронична болест од која биле лекувани навистина долго време. Понатаму еден сериозен процент на пациенти кои навистина доцна доаѓаат во болница со веќе многу тешка манифестација на болеста, и тоа е тренд што не прати од почетокот“, изјави министерот.
Филипче додаде дека има пациенти кои починале од друга сериозна хронична болест, но сепак биле дополнително заболени и од Ковид-19.
„Ние останавме доследни на тоа што го правиме од почетокот, а тоа е објавување на сите пациенти кои и покрај тоа што имале сериозна хронична болест, и покрај тоа што и таа можеби била директна причина за смртта, сепак биле дополнително заболени и од Ковид-19, и е битно за да имаме реална епидемиолошка состојба и слика во земјава. Ние ги регистрираме и објавуваме сите случаи на заболени од претхондите 24 часа,. Можеби еден или двајца случаи можат од еден да преминат во друг ден ако резултатот од тестот не е стигнат или некој сличен технички проблем во однос на документацијата, меѓутоа бројката е таа“, посочи Филипче.
На новинарско прашања во однос на идни мерки кои би се преземале, Караџовски истакна дека размислува три чекори пред Владата.
„На хартија имам ставено опција А, Б, Ц, Д. Некогаш кажувам дека имаме црно сценарио. Во моментов предложените мерките е крајно време да се усвојат, имаме состојба слична на полициски час. Не се предаваме сега, имаме време за тоа. Никој од нас не се радува да донесе таква одлука. Ќе се наруши психичкото здравје на луѓето, се ремети социјалниот живот“, истакна Караџовски.