По денешната оставка на пратеникот Павле Богоевски, неговото место ќе го заземе Александар Филиповски, откако ќе биде констатирана оставката на независниот пратеник од пратеничката листа на СДСМ.
Александар Филиповски е следниот на листата, на 17 место, кој не извршува некаква функција.
На листата во ИЕ1 од СДСМ и коалицијата на предвремените парламентарни избори во 2016-та се најдоа следните имиња:
- Стево Пендаровски
- Рената Дескоска
- Дамјан Манчевски
- Стефан Богоев
- Павле Богоевски
- Соња Мираковска
- Диме Велковски
- Татјана Прентовиќ
- Ивана Туфегџиќ
- Петар Атанасов
- Лилјана Поповска
- Никица Корубин
- Анета Симеска – Димоска
- Дарко Каевски
- Далибор Богдановски
- Снежана Калеска – Ванчева
- Александар Филиповски
- Енвер Хасиќ
- Михаела Иванова
- Љупчо Бошковиќ
Филиповски не е познат во јавноста и за него речиси и да нема никакви информации.
Павле Богоевски денеска си поднесе оставка поради скандалот со објавување на снимка во која тој наводно нарачува кокаин. Тој одлуката за оставка ја донел уште кога се самопријави во полициска станица за наводно купување на масло од канабис, а денеска ја изнесе во јавноста и пред пратенците на седницата на Комисијата за мандатно имутетни прашања каде требаше да се гласа за одземање на мандатот на пратеникот во бегство, Никола Груевски. Седницата беше прекината, а гласањето ќе се одложи за од понеделник.
Одлуката на пратеникот Павле Богоевски да даде оставка од пратеничката функција според премиерот Зоран Заев е храбра и значи понесување одговорност, иако смета дека тој е добар пратеник и се надева на идна соработка со него.
„Тој е одличен партеник и е еден од симболите на Шарената револуција, а најголемиот симбол се сите наши граѓани секако. Ќе ми биде задоволство да продолжам со таков човек да работам, тоа мора да го кажам, затоа што знам овој парламентарен состав каква капацитетност покажа и донесе многу тешки одлуки. Знам како се димензионираа многу програмски определби, многу успеси на оваа земја во кои беше вграден пратеникот Павле Богоевски. Верувам, како и да одлучи, во кој сегмент од својот живот да работи ќе ми биде драго да соработувам со него. Затоа што си ја сака земјата до небото, сака да се вгради во нејзиниот успех и верувам дека ќе најдеме начин за идни соработки. Ја поздравувам одлуката која е храбра и понесување на одговорност дури и за етички работи за кои граѓаните од нас политичарите очекуваат да повлечеме и чекори“, рече Заев.
М. И.
фотографија од фејсбук профилот на Филиповски
