„За одредено време ќе го смениме начинот на плаќаќање кон аптеките за лековите издадени на рецепт и сигурен сум дека проблемот со недостиг од лекови во аптеките во иднина нема да се случува.“
Ова денеска го истакна министерот за здравство Венко Филипче, кој рече дека со Фондот за здравствено осигурување на Македонија активно работат, а проблемот го лоцираат во начинот на исплата на аптеките за што сега бараат соодветен начин да се коригира, кој ќе дозволи да се надмине тоа.
– Сега додека се уште важи постојниот начин на плаќање Фондот најде едно преодно решение за зголемување на квотите, а за кратко време кога ќе го утврдиме најдобриот начин наместо плаќање по рецепт ќе излеземе со официјални информации и ќе ја спроведеме мерката, додаде Филипче, одговарајќи на новинарско прашање по прес-конференцијата на која информираше за намалувањето на цените на лековите.
Неопходно е на кутијата на лековите што ќе бидат предмет на паралелен увоз да се стават упатства за лекот што се наоѓа во кутијата, затоа што многу често се случува внатрешното упатство да се изгуби и пациентите да не знаат каков лек има во кутијата.
Ова се главните измени во делот на паралелниот увоз на лекови опфатени во Законот за лекови и медицински средства кои денеска ги образложи министерот за здравство Венко Филипче, одговарајќи на новинарско прашање по прес-конфренцијата на која информираше за намалувањето на цената на лековите.
– Најзначајната промена која Законот досега не ја бараше, е тоа дека се бара сертификат (од производителот на лекот и од сертифицирана лабораторија од земјата која лекот го произведува или од наша соодветна лабораторија во земјава) за квалитет на лекот кој се увезува во нашата земја, истакна министерот Филипче.
Додаде дека има уште една промена во Законот во однос на тоа што и како може Агенцијата за лекови и медицински средства да прави постапки за набавка на лекови.
Извор: МИА