Форумот за демократска Македонија (ФДМ) преку соопштение ја поздрави иницијативата за решавање на проблемот со името, што е главна пречка за интеграција на државата во ЕУ и НАТО структурите.
Според форумот, денешната посета на медијаторот Метју Нимиц на Република Македонија како и неодамнешната средба на премиерот Зоран Заев со неговиот грчки колега Алексис Ципрас во Давос, се силен импулс за конструктивни разговори кои би воделе кон достоинствено и прифатливо решение на овој повеќедецениски спор.
– ФДМ ќе го поддржи исходот за кој македонската Влада, граѓаните на Република Македонија и сите учесници во преговорите ќе одлучат дека е решение на спорот. Решавањето на овој спор ќе ја отстрани најголемата пречка за влезот во ЕУ и НАТО, што пак за Република Македонија ќе отвори перспективи за многу позасилен економски развој и силни гаранции за стабилност и опстанок, се наведува во соопштението.
Воедно, се нагласува потребата од продолжување со процесот на реформите.
– Ја поттикнуваме Владата да не ги запостави реформите што ќе ја менуваат Република Македонија навистина да стане општество за сите, а не „заробена и партиска држава”, каде правото ќе важи еднакво за сите, институциите ќе бидат во служба на граѓаните, а борбата со корупцијата и криминалот ќе бидат суштински, а не само декларативни заложби, стои во соопштението од Форум за Демократска Македонија кој е заедница на иселеници од Република Македонија и нивните потомци од целиот свет.
[divide]
Извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
