Условите во затворите и третманот на затворенците долго време беше на критика на претходната власт, која меѓу другото „се грижеше“ затворите да бидат пренатрупани сурови места, бидејќи беа еден од начините за пресмтка со неистомислениците. Дел од жртвите на таквото режимско владеење беа и панелисти во две панел дискусии организирани од ЦИВИЛ „Жртви на режимот -сведоштва и слики“.
Неодамна, во интервју за ЦИВИЛ Медиа, директорот на Управа за извршување санкции при Министерството за правда, Јовица Стојановиќ, направи паралела на затворските услови до 2017 и потоа, во периодот по неговото назначување.
[envira-gallery id="133867"]
„Зборот катастрофа е мал збор да се опише сето она со што се соочив на терен по моето доаѓање за директор на УИС во 2017, имајќи во предвид што беше оставено во 2006, а што се наследи во 2017 година. Сите проекти што ги започнавме, како и оние што веќе беа започнати, како оној за целосна реконструкција на КПД Идризово ги правиме да бидат реални на терен. За овие две и пол години можам да кажам дека сум задоволен од постигнатото вклучувајќи ја пред и потоа состојбата заедно со сите ново поставени директори во затворскиот систем Република Северна Македонија“, потенцираше Стојановиќ.
На фотографиите што се дел од извештајот на УИС, може да се направи споредба на дел од казнено поправните установи во кои е извршена реконструкција со цел подобрување на условите за престој на затвореницитие.
За да го решат на долгогодишниот проблем со спроводот на осудени и притворени лица, Управата за извршување на санкции набави четиринаесет нови возила од кои три патнички комбиња и единаесет специјализирани возила за пренос на осудени и притворени лица. Возилата се според современи европски стандарди.
Целосно се опремени и пуштени во употреба новите објекти од отвореното и полуотвореното одделение во КПУ Затвор Идризово.
Се направи и целосна реконструкција на осум простории за осамување (самица) и подобрување на водоснабдувањето преку ископ на бунар длабок 25м, инсталација на соларен систем за топла вода, се дел од новитетите во КПУ Затвор Штип.
Поплочување на подот на затворот со вкупна површина од 300 м2, како и реновирање на внатрешноста, изградба на магацински простори, реновирање на чајна кујна, канцеларии и занимални се дел од рекострукциите во КПУ Затвор Прилеп, како и реновирани тоалети во затвореното одделение и ќелии во КПУ Затвор Скопје.
„Навистина, на терен се менуваат многу работи, што со фондови, што со проекти, меѓутоа и со сопствени средства на финансирање, односно буџетот кој е на исто рамниште како и претходно. Сепак, домаќински се користи од установите и така се прават заштеди за да се направат инвестиции што дополнително ќе придонесат да заштедиме средства“, изјави Стојановиќ за ЦИВИЛ Медиа.
Б. Јордановска
