Парламентарниот институт денеска одржа средба со претставници на граѓанските организации што со своите активности и поле на делување се поврзани со работата на Собранието на Македонија. Целта на средбата е да се зголеми соработката меѓу двете страни, преку зголемување на отвореноста, транспарентноста и отчетноста на Собранието.
Тркалезната маса ја отвори претседателот Талат Џафери кој потенцираше дека граѓанските организациите се вистински и неопходен партнер на Собранието.
„Отворениот ден за граѓаните нема да е единствен механизам со што ќе ја зголемиме отвореноста и транспарентноста на Собранието. Пристапот на граѓаните ќе се олесни, затоа што ние сме обврзани од нив и за нив“, истакна Џафери. Тој најави и промени на веб-страницата на Кабинетот на претседателот, за подобрување на комуникацијата – за да можат граѓан(к)ите да се вклучат во собраниските работи.
Парламентарниот институт го претстави проектот „Партнерство за отворена власт“, а се осврна и на буџетската транспарентност и отчетност и на улогата на Собранието.
Како најголеми проблеми беа посочени отсуството на задолжителна дебата за завршниот извештај на Државниот завод за ревизија, големата политизираност и непочитувањето на буџетскиот календар, нерамномерниот однос меѓу Собранието и Владата, во однос на Предлог буџетот. Посочено беше дека со тоа што Владата е ексклузивен предлагач и нејзиниот збор е последен, се нарушува концептот на „чек енд баланс“.
За недостатоците во досегашната работа на Собранието, особено во делот на донесување на буџетот, потврда е и последното меѓународното истражување за отворен буџет – OBS, кое се темели на 109 индикатори. Во делот на транспарентноста, македонското Собрание има оценка 35 од 100, што значи дека има минимална информираност на јавноста за донесувањето на буџетот. Во делот на вклученоста на јавноста во донесувањето на буџетот, податоците се уште попоразителни, односно оценката е 6 од 100! Што се однесува за степенот до кој се обезбедува надзор, Собранието има ограничен надзор, со оценка 42 од 100, а во делот на надзорот на Државниот завод за ревизија, оценката е 100 од 100.
Граѓанските организации што беа дел од тркалезната маса, меѓу кои и ЦИВИЛ-Центар за слобода, во духот на отвореноста имаа можност да ја разгледаат собраниската зграда и да се информираат за нејзината историска вредност, како и да се потсетат на почетоците на демократијата во Македонија.
Текст и фото: Марија Теговска
