И оваа година доминираат (како и секогаш досега) мажите како кандидати за градоначалници. А неколкуте жени, кои решија да ја водат битката со „мажјаците“…, граѓан(к)ите наместо да покажат интерес за нивните идеи и проекти, тие се занимаваат со нивното минато, колку била „поштена“ една кандидатка, другата каква фризура имала, третата дали се лакирала, дали има маж или е сингл…
Од друга страна, пак, кандидатите за градоначалници не пропуштаат можност да си ги пофалат сопругите. Демек, граѓан(к)ите треба да им веруваат дека нема да ги изневерат во ветувањата, исто како што тие им се верни на своите сопруги.
Откако започна кампањата, кандидатот за градоначалник на Кисела Вода од редовите на ВМРО-ДПМНЕ, Јохан Тарчуловски, по неколку дена „говорна апстиненција“, реши да прозбори. На средбата со претставниците на ОБСЕ/ОДИХР, тој рече дека нема да им ја исполни желбата, првото кафе како градоначалник да го испие со нив, туку првото кафе ќе го ужива со својата сопруга, Соња.
Паметно од негова страна. Вистинскиот маж така би постапил! Меѓутоа, познавајќи ја Соња, колку несмасно се движи, за да не падне повторно од тераса, убаво би било кафе пиењето да го прават, во некоја затворена просторија.
Лидерот на СДСМ, Зоран Заев, на митингот во Куманово, прогнозираше дека Максим Димитриевски ќе стане градоначалник уште во првиот круг.
„Верувајте, штом е тука и мојата сопруга, Зорица Заева, и таа сака да биде дел од оваа победничка атмосфера. Има една тажна вест, но не за вас, туку за ‘Груевци’. ВМРО-ДПМНЕ е поделена, ги пакуваат веќе куферите, а во нив е и новата ера и новата далавера“, рече Заев.
Тој пред неколку дена во Дојран се „пофали“ дека со првата девојка, најубавите денови ги поминувал токму таму. Нормално е сега и неговата сопруга да оди со него низ градовите, за да не се пофали повторно дека и во Куманово имал девојка… Тоа е, љубоморни жени, кој да ги разбере. #ИздржиЗаев!
Кандидатот за градоначалник на Скопје од СДСМ, Петре Шилегов, на пазарот во Бутел случајно се сретна со кандидатот за градоначалник на оваа општина од ВМРО-ДПМНЕ, Дарко Костовки. Шилегов во свој стил, му советуваше на соперникот, дека подобро ќе биде ако тој победи на избори.
„Поштовање, ВМРО, дајте рака поздравете се, мајку му… Народот е убеден дека јас ќе победам и вие убаво знаете, очите ви зборуваат“, му рече Шилегов на Костовски.
На социјалните мрежи се појави фотомонтажа со постер на српскиот пејач, Аца Лукас, како дел од кандидатските листи на ВМРО-ДПМНЕ, со слоганот – „Секогаш работа, секогаш Македонија“. Во контекст на разговорот помеѓу Шилегов и Костовски, кој ќе победи и чии „очи зборуваат“, еве еден рефрен од Лукас: „Упали светло да се гледамо у очи, као у старој дечијој игри, ко ќе дуже моќи, каже да судбину нико не може да спречи, шта ќе нам реќи, очи ќе нам реќи … “
И оваа година, традиционално се одржа манифестацијата „Ашуре“ во населеното место Канатларци кај Прилеп. На настанот, што го одликува долга традиција и историја, присутен беше и актуелниот градоначалник и кандидат за нов мандат од ВМРО-ДПМНЕ, на претстојните локални избори, Марјан Ристески.
Кандидатите на ВМРО-ДПМНЕ, прво почнаа со реклами и билборди на албански јазик, сега одат и на муслимански празници, како што е „Ашуре“, а ништо чудно, додека трае изборната кампања, и на некој сунет да присустуваат. За тие пусти гласови, пародија направија од демохристијанската им партија.
Актуелниот градоначалник на Штип и кандидат од ВМРО-ДПМНЕ за повторен мандат, Илчо Захариев, рече дека во време на владеењето на Груевски се изградени неколку големи проекти, што се претставени во „отчетот“ од 500 страници. Ги потенцираше неколкуте изградени улици и автопатишта. Откако ВМРО-ДПМНЕ автопатиштата ги направија рамни и „прецизни“ како писти, Захариев вети дека во Штип ќе изгради и аереродром, само му треба доверба на граѓан(к)ите. А, аеродромот за што ќе биде наменет, за увоз и извоз на мигранти, или…!?
Дехран Муратов
