„ВМРО-ДПМНЕ не ги признава овие избори и никогаш нема да ги смета за фер и демократски. Покрај тоа што не ги признаваме, бараме итно враќање на демократијата во земјата, организирање на предвремени парламентарни избори согласно Пржинскиот модел, организирани од техничка влада“, соопшти лидерот на ВМРО-ДПМНЕ, Никола Груевски, по завршување на вториот круг на локалните избори. Во штабот на ВМРО-ДПМНЕ, каде што го држеше својот долг, трогателен говор, присуствуваа претежно млади лица, кои најверојатно, не успеале да се соберат во поголем број за да ги „збијат редовите“!
Груевски истакна дека локалните избори не ги признаваат, бидејќи минале со бројни нерегуларности, со обиди за правење „бугарски воз“, со притисоци врз земјоделците и врз администрацијата.
Лидерот на ВМРО-ДПМНЕ, исто така, побара смена на директорот на ААВМУ, оставка на претседателот на ДИК, истрага и вештачење на уредите за преслушување на УБК, завршување на судењето за случајот за „Поткуп“, формирање на специјално јавно обвинителство кое ќе спроведе истрага на изборните нерегуларности од изборите од 2016 и 2017 година, како и ослободување на сите лица кои се товарат за случувањата од 27 април кога упаднаа во Собранието.
Груевски рече дека целата изборна кампања била во знакот на организирање криминални избори, односно, дека СДСМ уште пред изборите им вршел притисок на потенцијалните кандидати на ВМРО-ДПМНЕ, особено со поднесување кривични пријави против актуелните градоначалници кои се борат за уште еден мандат.
„Имаше огромен молк од полицијата, која е активен соучесник во кршењето на изборниот процес. Рано утринава, изборниот процес почна со кршењето на изборниот молк, со фрлање летоци во општина Кисела Вода и Гази Баба. Полицијата е верен чувар на активистите кои ги делат летоците“, изјави Груевски, додавајќи дека Зоре Темелковски, татко на кандидатот за градоначалник на Кисела Вода, отворено се заканувал дека сега биле на власт и дека можеле да избркаат од работа стотина лица, особено во Драчево.
Д. Муратов
