Никола Груевски, поранешен премиер, лидер на ВМРО-ДПМНЕ чија позиција е сериозно разнишана, осомничен за криминал, корупција, насилство и изборни кражби, чија пасош е одземен како мерка за претпазливост која ја изрече судот, продолжува со своојот „увид во проектите“. Во еден период, тие прошетки на Груевски престанаа, веројатно, поради презафатеност со настаните околу парламентот и со сослушувањата во СЈО, но пред неколку дена се интензивираа.
Неговиот најнов „увид“ се однесува на патарината пред Куманово. Патот Скопје – Куманово е во очајна состојба, но патарините, важно, се поставени. По посетата на нефункционалните патарини на очајниот автопат, Груевски, телохранителите и другите придружници, се упатиле во Куманово на „прошетка низ чаршијата“.
Еве го текстот на партиската веб-страница за оваа најнова „политичка победа“ на Груевски:
„На влезот на Куманово се наоѓа првата од предвидените 7 модерни електронски патарини кои ќе се градат во земјава. Граѓаните ќе можат да изберат дали ќе платат со пари, со картичка или со специјални тагови кои ќе бидат залепени на предните ветробрански стакла на автомобилите. Првата модерна патарина се очекува да биде пуштена во употреба до крајот на годината.
Лидерот на ВМРО ДПМНЕ, Никола Груевски изврши увид во првата електронска патарина во земјава. Првиот човек на партијата се надева дека новата Влада нема да го стопира овој проект кој значително ќе ја намали гужвата на кумановските патарини.
Претседателот на партијата прошета низ кумановската чаршија каде оствари средба со граѓаните од Куманово кои посочија на големиот проблем што го имаат со урбаната мафија, која како што велат, со години владеела со градот.
Кумановските пензионери побараа од Груевски да не дозволи да се укинат придобивките за пензионерите, а помладите, да се вложува повеќе во развојот на градот со отворање нови бизниси и нови работни места пред се, за младите. Се пожалија на урбаниот и сообраќаен хаос, и редици други проблеми од реалниот живот. ‘Ние ќе понудиме решенија на следните локални избори кои ќе значат решавање на проблемите на кумановчани, затоа што заслужуваат подобро’, додаде Груевски“.