На третиот панел од меѓународната конференција„Одбрана на демократијата и човековите права“, насловен „Спротивставување на авторитаризмот“, со свое излагање пред публиката и учесниците се обрати поранешната амбасадорка на германија Гудрун Штајнакер.
Штајнакер на почетокот на своето обраќање се осврна кон работата ЦИВИЛ.
„Џабир го сретнав веднаш по моето доаѓање во Скопје, во 2011 година, и почнав да ја ценам работата на ЦИВИЛ, како една од најдобрите организации за зајакнување на граѓанското општество и промовирање на човековите права и слободно општество. Особено ценам јасната позиција на ЦИВИЛ од самиот почеток, во врска со војната на Русија во Украина – можеби најголемата опасност во моментов за нашиот дел од светот.
Авторитаризмот е закана која треба многу сериозно да ја сфатиме, во ова многу тешко време… Избор на секој човек или група, е да одговорат на овие проблеми, но, политичарите, бизнис елитите и интелектуалците, треба да играат водечка улога во овој одговор, во согласност со своите одговорности. Но често се случува сосема спротивното- интелектуалните елити ги злоупотребуваат своите влијанија, за повеќе да ги заплашат граѓаните, го гледаат својот интерес, и се решаваат за авторитарни решенија што е хипокризија во меѓународната политика.
Решенијата за овие прашања можат да ги најдат слободни луѓе, во слободни општества, слободен разговор и слободни медиуми“, посочува Штајнакер меѓу другото.
Гудрун Елизабет Штајнакер е поранешна германска дипломатка со истакната кариера која се протега повеќе од три децении. Таа имаше клучни функции, вклучително и амбасадорка во Северна Македонија (2011–2014) и Црна Гора (2014–2016). Штајнакер служела во амбасадите на Германија во Москва, Рим, Осло и Загреб и во ОБСЕ во Косово и Виена. По пензионирањето, таа е активна во Здружението на Југоисточна Европа и Фондацијата Еуронатур.
Меѓународната конференција „Одбрана на демократијата и човековите права“ во Скопје е дел од програмата на Неделата на човекови права – иницијатива на Владата на Северна Рајна-Вестфалија.
